काठमाडौं। राजन सुब्बा र शेखर श्रेष्ठ दोस्रो राष्ट्रिय खुला जुनियर तथा भेट्रान टेबल टेनिस प्रतियोगिताको भेट्रान ६० वर्षमाथिको पुरुष सिंगल्सतर्फ सोमबार फाइनलमा प्रवेश गरेका छन्।
मदन भण्डारी स्पोर्ट्स एकेडेमीको आयोजनामा जारी प्रतियोगिताको सेमिफाइनलमा राजनले आनन्दरत्न धाक्वालाई ३–० ले पराजित गरे। अर्का सेमिफाइनलमा शेखरले अशोक शर्मालाई पनि ३–० को सोझो सेटमा हराउँदै उपाधि भिडन्तमा स्थान सुरक्षित गरे।
राष्ट्रिय टेबल टेनिस प्रशिक्षण केन्द्रमा भइरहेको प्रतियोगितामा जुनियरतर्फ ४ र भेट्रानतर्फ ३ गरी कुल ७ स्पर्धामा प्रतिस्पर्धा भइरहेको छ। प्रतियोगिता संयोजक धर्ममान वज्राचार्यका अनुसार चैत २८ गतेसम्म सञ्चालन हुने प्रतियोगितामा २५० खेलाडी सहभागी छन्।
प्रत्येक स्पर्धामा शीर्ष तीन स्थान प्राप्त गर्ने खेलाडीले क्रमशः नगद १० हजार, ५ हजार र २ हजार ५ सय रुपैयाँ पुरस्कार प्राप्त गर्नेछन्।
