काठमाडौं। नेपालले मलेसियाको क्वालालम्पुरमा सम्पन्न १६ औं विश्व योगासना च्याम्पियनसिपमा उत्कृष्ट प्रदर्शन गर्दै २ स्वर्ण, १ रजत र ३ कांस्यसहित कुल ६ पदक जित्न सफल भएको छ।
चैत २३ र २४ गते आयोजना भएको प्रतियोगितामा ९ देखि ११ वर्ष उमेर समूहमा प्रयासजंग चौहान र १२ देखि १४ वर्ष उमेर समूहमा प्रत्युषा खतिवडाले स्वर्ण पदक जिते।
सोही ९ देखि ११ वर्ष उमेर समूहमा अमिष पटेलले रजत पदक हात पार्दा किरन मगर र संस्कृती चौलागाईंले कांस्य पदक जिते। १५ देखि १७ वर्ष उमेर समूहमा सुन्दर सार्कीले पनि कांस्य पदक प्राप्त गरे।
प्रतियोगितामा २३ राष्ट्रका १५३ खेलाडी सहभागी भएका थिए। नेपालबाट ३१ खेलाडीले सहभागिता जनाएका थिए।
नेपालको यो सफलताले अन्तर्राष्ट्रिय योगा क्षेत्रमा देशको प्रतिष्ठा थप उचो बनाएको छ।
