काठमाडौं । सुदूरपश्चिम विश्वविद्यालयका मुकेश विष्ट र त्रिभूवन विश्वविद्यालय (टीयू) की विना थारुले दोस्रो विश्वविद्यालय खेलकुद महोत्सवको एथलेटिक्स १०० मिटर दौडमा स्वर्ण जितेका छन्। मुकेश पुरुष र विना महिलामा पहिलो भए।
पोखरा रंगशालामा भएको प्रतिस्पर्धामा मुकेशले १०० मिटर दूरी ११.२२ सेकेन्डमा पूरा गर्दै स्वर्ण जिते। काठमाडौं विश्वविद्यालयका विकासकुमार शाहले ११.६५ सेकेन्डमा दोश्रो स्थान हासिल गरे भने टीयूका प्रकाश जोशी ११.८४ सेकेन्डमा तेश्रो भए।
विनाले महिलामा १०० मिटर दौड १४.४० सेकेन्डमा पूरा गर्दै पहिलो स्थान ओगटिन्। टीयूकी आकृति चौधरी १४.९० सेकेन्डमा दोश्रो र पूर्वाञ्चल विश्वविद्यालयकी प्रमिला खड्का १५.०० सेकेन्डमा तेश्रो स्थानमा रहे।
अर्को स्वर्ण मुकेशले पुरुष लङजम्पमा जिते। उनले ६.७० मिटरको जम्प गर्दै सुदूरपश्चिमको खेमराज जोशीलाई पछाडि पार्दै स्वर्ण जिते। खेमराजले ५.८२ मिटर जम्प गरे भने टीयूका दिवस रेग्मी ५.५३ मिटर जम्प गर्दै तेश्रो भए।
टीयूका सुशिलकुमार बानियाँले पुरुष ४ सय मिटर दौडमा ५३.९१ सेकेन्डमा स्वर्ण जिते। दोश्रो स्थानमा दिवस रेग्मी (५५.५६ सेकेन्ड) र तेश्रो स्थानमा सुदूरपश्चिमका दीपकराज भाट (५६.२९ सेकेन्ड) रहे।
महिला ४ सय मिटर दौडमा मधेश प्रदेश विश्वविद्यालयकी हिमाली शाहीले १ मिनेट १०.४६ सेकेन्डमा स्वर्ण जितिन्। टीयूकी राज्यलक्ष्मी रावल १ मिनेट १०.४८ सेकेन्डमा रजत र गण्डकीकी कृति गिरी १ मिनेट १५.३० सेकेन्डमा कांस्य हात पारे।
यस प्रतिस्पर्धामा पहिलो दिन ५ स्वर्ण वितरण गरिएको छ, जसमा सुदूरपश्चिम र टीयूले समान २-२ स्वर्ण जितेका छन्। मधेश प्रदेशले १ स्वर्ण जितेको छ। एथलेटिक्सको बाँकी ५ स्पर्धाको फाइनल बिहीबार हुनेछ।
