काठमाडौं- नेपालले आगामी मंसिर ४ देखि ७ गतेसम्म मलेसियामा आयोजना हुने एशियन डजबल च्याम्पियनसिप–२०२५ मा पहिलोपटक सहभागिता जनाउन लागेको छ। मलेसियन एसोसिएसन अफ डजबलको आयोजनामा हुने यस महत्त्वपूर्ण प्रतियोगितामा सहभागी हुने उद्देश्यले १८ सदस्यीय नेपाली राष्ट्रिय डजबल टोली मङ्गलवार मलेसिया प्रस्थान गर्दैछ। यो सहभागितालाई नेपाली डजबल खेलको इतिहासमा ठूलो उपलब्धिको रूपमा हेरिएको छ।
टोलीलाई राष्ट्रिय खेलकुद परिषद् (राखेप) का सदस्य–सचिव टंक लाल घिसिङले बिदाइ समारोहमार्फत शुभकामना सहित बिदाइ गरेका थिए। उनले पहिलो ऐतिहासिक सहभागिताले नेपालमा डजबल खेलको वृद्धि, लोकप्रियता र अन्तर्राष्ट्रिय उपस्थितिलाई थप मजबुत बनाउने विश्वास व्यक्त गरे।
प्रतियोगिताका लागि नेपाली टोलीलाई विभिन्न निजी क्षेत्रका संस्थाहरूले सहयोग गरेका छन्। जर्सी पुलले मुख्य प्रायोजन प्रदान गरेको छ भने इम्पाएर ट्राभल्स एन्ड टुर्स टोलीको ट्राभल पार्टनर रहेको छ। त्यस्तै, जी स्पोर्ट्स होम किट पार्टनरका रूपमा र डिजिटल ल्याब ब्ल्याक आइ जर्नी प्रालि डिजिटल पार्टनरका रूपमा सहकार्य गरिरहेका छन्। निजी क्षेत्रको सक्रिय सहभागिताले नेपाली डजबल समुदायमा उत्साह थपिएको छ।
नेपाली टोलीमा कप्तान विराज दाहालसहित १२ खेलाडी रहेका छन्। टिममा प्रकाश सिंह ऐर, कृष्ण हरि बुढाथोकी, रबिन शाक्य, कृष्ण कुमार साह, अनिल कुमार तिखत्री, अनिल गुरुङ, विवेक उप्रेती, अच्युत नेपाल, रोशन अधिकारी, रामचन्द्र गौतम र विनोद कोईरालाको समावेश छ। युवा जोश, अनुभव र समर्पणयुक्त टोलीले पहिलो सहभागितामै प्रभावकारी प्रदर्शन गर्ने लक्ष्य राखेको छ।
टिम अफिसियलहरूमा टोली प्रमुख राजन गौतम, व्यवस्थापक कौशल ज्ञवाली, सहायक व्यवस्थापक हिरामणी नेपाल, प्रशिक्षक तथा खेलाडी अरुण तिमल्सिना, ट्रेनर बेनु कुमार राई र मिडिया अफिसर सन्दीप रिजाल रहेका छन्। उनीहरूले टोलीको तयारी, अनुशासन र समन्वयमा महत्वपूर्ण भूमिका निभाउँदै आएका छन्।
नेपालले पहिलोपटक एशियन डजबल च्याम्पियनसिपमा सहभागी हुँदै अन्तर्राष्ट्रिय डजबल मञ्चमा आफ्नो उपस्थिति जनाउन लागेको यो यात्रा नेपाली खेलकुदका लागि ऐतिहासिक क्षण हो। खेलाडी तथा अफिसियलहरूले उत्कृष्ट प्रदर्शन गर्दै नेपालको पहिचान उजिल्याउने आत्मविश्वास व्यक्त गरेका छन्।
