काठमाडौं – दुई फरक अन्तर्राष्ट्रिय तेक्वान्दो प्रतियोगितामा सहभागी हुन ३ सदस्यीय नेपाली टोली सोमबार चीन प्रस्थान गर्ने भएको छ। टोलीमा दुई खेलाडीसहित एक प्रशिक्षक छन्।
टोलीमा पुरुष ५८ केजी तौल वर्गमा सुमित विष्ट र ७४ केजी तौल वर्गमा आशिष भण्डारी प्रतिस्पर्धा गर्ने छन्। टोलीको प्रशिक्षकका रूपमा सयद हसन रेजा रहेका छन्।
टोलीले पहिलो प्रतियोगिता वैशाख १० देखि ११ गतेसम्म चीनको ताइयानमा हुने सातौं डब्लुटी प्रेसिडेन्ट्स कप (एसियाली क्षेत्र) मा खेल्नेछ। दोस्रो प्रतियोगिता भने वैशाख १६ देखि १७ गतेसम्म बुक्सीमा आयोजना हुने १३ औं एसियाली क्लब तेक्वान्दो प्रतियोगिता हुनेछ।
टोलीलाई सफलताको शुभकामना दिँदै राष्ट्रिय खेलकुद परिषद् (राखेप) का सदस्य–सचिव टंकलाल घिसिङ, कार्यकारी समितिका सदस्यद्वय कमलबहादुर भट्टराई र भानबहादुर चन्दले आइतबार विशेष समारोहबीच बिदाइ गरेका थिए।
