काठमाडौं — चौथो विश्व क्योकुसिन तेजुका कराते च्याम्पियनसिपका रजत पदक विजेता दावा शेर्पालाई नेपाल क्योकुसिन कराते (इको) संघले विशेष सम्मान प्रदान गरेको छ। बिहीबार आयोजित समारोहमा युवा तथा खेलकुद मन्त्री तेजुलाल चौधरी र राष्ट्रिय खेलकुद परिषद्का सदस्य–सचिव टंकलाल घिसिङले दावालाई नगद २५ हजार रुपैयाँसहित प्रशंसा पत्र प्रदान गरी सम्मानित गरे।
शेर्पाले जापानको फकुओकामा गत फेब्रुअरी २४ मा सम्पन्न प्रतियोगितामा पुरुष एकल काता विधामा उत्कृष्ट प्रदर्शन गर्दै रजत पदक जितेका थिए।
त्यसैगरी, सोही प्रतियोगिता अवधिमा (फेब्रुअरी २५) जापानमा सम्पन्न अन्तर्राष्ट्रिय डान ग्रेडिङ टेष्टमा पाँचौं डान हासिल गर्न सफल नेपाल क्योकुसिन कराते (इको) संघका अध्यक्ष दमन बस्नेतलाई पनि प्रशंसा पत्रसहित सम्मान गरियो।
सम्मान कार्यक्रममा संघका वरिष्ठ उपाध्यक्ष पदमराज सुवेदी, उपाध्यक्ष नन्दकुमार किराती लगायत अन्य पदाधिकारीहरूको उपस्थिति थियो।
यस सम्मानले राष्ट्रिय तथा अन्तर्राष्ट्रिय स्तरमा नेपाली कराते खेलाडीको मनोबल उच्च बनाउने विश्वास व्यक्त गरिएको छ।
