काठमाडौं, चैत २८ गते — राष्ट्रिय खेलकुद परिषद् (राखेप) का सदस्य–सचिव टंकलाल घिसिङले मलेसियाको क्वालालम्पुरमा सम्पन्न १६औं विश्व योगासना च्याम्पियनसिपमा पदक जितेर फर्किएका नेपाली खेलाडीहरूलाई स्वागत गर्दै बधाइ दिएका छन्।
त्रिपुरेश्वरस्थित राखेपको सभाकक्षमा बिहीबार आयोजित विशेष कार्यक्रममा सदस्य–सचिव घिसिङले खेलाडीहरूको स्वागत गर्दै उत्कृष्ट प्रदर्शनका लागि बधाइ तथा शुभकामना व्यक्त गरे। पदक विजेता टोली बुधबार स्वदेश फर्किएको हो।
चैत २३ र २४ गते भएको प्रतियोगितामा नेपालले विभिन्न उमेर समूहमा २ स्वर्ण, १ रजत र ३ कांस्य गरी जम्मा ६ पदक जित्न सफल भएको थियो।
प्रयासजंग चौहान र प्रत्युषा खतिवडा ले स्वर्ण पदक जितेका हुन् भने अमिष पटेल ले रजत र किरन मगर, संस्कृति चौलागाईं र सुन्दर सार्की ले कांस्य पदक प्राप्त गरेका थिए।
प्रतियोगितामा २३ राष्ट्रका १५३ खेलाडी सहभागी थिए भने नेपालबाट ३१ जना खेलाडीले प्रतिनिधित्व गरेका थिए। नेपाल योग खेलकुद संघका महासचिव चुडामणि खरेलका अनुसार नेपाल समग्र रूपमा तेस्रो स्थानमा रह्यो। भारत पहिलो र अमेरिका दोस्रो स्थानमा रहेका थिए।
खेलाडीहरूलाई प्रतियोगितामा सहभागी गराउने पूर्वतयारीस्वरूप पुष्करराज पन्त, संग्राम पुरी, आनन्द गैरे र दीपा पाण्डे ले दुई हप्तासम्म प्रशिक्षण दिएका थिए।
कार्यक्रममा सम्बोधन गर्दै सदस्य–सचिव घिसिङले जुनियर खेलाडीहरूलाई विशेष प्राथमिकता दिएर प्रशिक्षण तथा प्रोत्साहन गर्न सकेमात्र राष्ट्रलाई अन्तर्राष्ट्रिय स्तरमा सफलता दिलाउन सकिने उल्लेख गरे। उनले जुन विधामा खेलाडीहरूले पदक जितिरहेका छन्, त्यही विधामा अझ बढी ध्यान दिनुपर्ने आवश्यकता पनि औंल्याए।
स्वर्ण विजेता प्रयास र प्रत्युषाले देशका लागि स्वर्ण जित्न पाउँदा अत्यन्त खुशी लागेको बताउँदै, प्रतियोगिता मार्फत धेरै सिक्ने अवसर प्राप्त भएको अनुभव बाँडे।
