काठमाडौं– अस्ट्रेलियन ओपन कराते च्याम्पियनसिपमा नेपालको प्रतिनिधित्व गर्न ९ सदस्यीय नेपाली टोली बुधबार राति अस्ट्रेलियाको सिड्नी प्रस्थान गर्ने भएको छ। अप्रिल ४ देखि ६ तारिखसम्म सिड्नीमा आयोजना हुने यस प्रतिष्ठित प्रतियोगितामा नेपालका ५ खेलाडीले सहभागिता जनाउनेछन्।
टोली बुधबार राति ११:०० बजे प्रस्थान गर्ने तालिका छ। प्रतियोगितामा १ पुरुष र ४ महिला खेलाडीले नेपालको चुनौती प्रस्तुत गर्नेछन्। पुरुषतर्फ ६७ केजीमुनि सन्तोष श्रेष्ठ प्रतिस्पर्धा गर्नेछन् भने महिलातर्फ ५० केजीमुनि वर्षा बुढा मगर, ५५ केजीमुनि पुष्पका लामा, ६१ केजीमुनि सविना श्रेष्ठ र ६८ केजीमाथि एरिका गुरुङ सहभागी हुनेछन्।
टोलीको व्यवस्थापनमा प्रशिक्षक कुशल श्रेष्ठ र मन्डेकाजी श्रेष्ठ रहेका छन् भने सहायक प्रशिक्षक तथा अफिसियलको भूमिकामा अमिर राना रहनेछन्। त्यस्तै, निर्णायकका रूपमा तारा गुरुङ समावेश छन्। टोलीलाई सफलताको शुभकामना दिँदै राष्ट्रिय खेलकुद परिषद् (राखेप) का सदस्य–सचिव टंकलाल घिसिङले बुधबार एक विशेष समारोहबीच बिदाइ गरे। सो अवसरमा आठौं दक्षिण एसियाली खेलकुद (साग) का स्वर्ण विजेता कराते खेलाडी विजय लामाले टोलीलाई प्रायोजन गरिएको ट्रयाकसुट प्रदान गरे।
नेपाली खेलाडीहरूले यस प्रतियोगितामा उत्कृष्ट प्रदर्शन गर्ने अपेक्षा गरिएको छ, जसले अन्तर्राष्ट्रिय स्तरमा नेपालको पहिचान अझ मजबुत बनाउने विश्वास गरिएको छ।
