काठमाडौं। एपीएफका क्षितिज खनाल र नेपाल प्रहरीकी निता लम्सालले तेश्रो यलम्बर राष्ट्रव्यापी खुला ब्याडमिन्टन प्रतियोगिताको सिंगल्स उपाधि जितेका छन्। क्षितिज पुरुषतर्फ र निता महिलातर्फ च्याम्पियन बने।
नखिपोट युथ क्लबको आयोजना र नखिपोट ब्याडमिन्टन सर्कलको सह–आयोजनामा भएको यस प्रतियोगिताको पुरुष फाइनलमा क्षितिजले नेपाल आर्मीका विवेक चौधरीलाई २१–८, २१–१५ को सोझो सेटमा पराजित गरे। धादिङका सुजन थापा र एपीएफका भोजबहादुर गुरुङ तेश्रो स्थानमा रहे।
महिला फाइनलमा निताले आर्मीकी अनुमाया राईलाई २१–१२, २१–१३ को सोझो सेटमा पराजित गर्दै उपाधि जितिन्। आर्मीकी शेस्ना सिर्पाली र स्पोर्ट्स हबकी सीताकुमारी राई तेश्रो भए। पुरुष र महिला दुवैको सिंगल्समा शीर्ष तीन स्थान प्राप्त गर्नेले क्रमशः ३०, १५, र ७ हजार ५ सय नगद पुरस्कार प्राप्त गरे।
प्रहरीका कविर केसीले आर्मीका सुविन श्रेष्ठलाई २१–१०, १६–२१, २१–११ ले हराउँदै स्वर्ण जिते। तेश्रो स्थानमा फिट्नेस पार्कका अमन डंगोल र लभ बीकेका इमा तामाङ रहे। विजेताले १५ हजार, उपविजेताले १० हजार र तेश्रोले ५ हजार नगद पुरस्कार पाए।
क्षितिज खनाल र शोभा गौचनको जोडीले २१–१२, २१–५ को सोझो सेटमा जीवन आचार्य र निता लम्सालको जोडीलाई हराउँदै स्वर्ण जिते। तेश्रो स्थानमा आर्मीका पविन लिङथेप र अनुमाया राई तथा विधान अधिकारी र अमिता गिरीको जोडी रहे।
४५ वर्ष माथिका पुरुष डबल्समा सञ्जय कपाली र अनिल थाम्सुहाङको जोडीले तनहुँका देव गुरुङ र कास्कीका शम्भुकुमार श्रेष्ठको जोडीलाई २२–२०, २१–१७ ले हराउँदै उपाधि जिते। तेश्रो स्थानमा शान्त डंगोल र कृष्ण श्रेष्ठ तथा हरि खत्री र राजकुमार पोखरेल रहे।
आर्मीका पविन लिङथेप र विधान अधिकारीको जोडीले सूर्यदर्शनका दीपक राणा र जनिश थकालीको जोडीलाई २१–१६, २२–२०, २१–१४ ले हराउँदै पहिलो स्थान हात पारे। तेश्रो स्थानमा राम मल्ल ठकुरी र सुजन थापा, सुमित महर्जन र सुमन शाक्यको जोडी रहे।
यस प्रतियोगितामा कुल १ सय ३१ खेलाडीले प्रतिस्पर्धा गरेका थिए, र विभिन्न छ स्पर्धामा खेल भएको थियो।
विजेताहरूलाई ललितपुर महानगरपालिका वडा १४ का अध्यक्ष अमृतजंग महतलगायतले पुरस्कार प्रदान गरे। सो अवसरमा गायक राजेश पायल राईलाई पनि सम्मान गरिएको थियो।
