काठमाडौं — तेश्रो मदन भण्डारी पुरुष तथा महिला राष्ट्रिय फुल कन्ट्याक्ट कराते प्रतियोगितामा रुपक नेपाली र मन्जु विकले स्वर्ण पदक जितेका छन्।
त्रिपुरेश्वरस्थित राष्ट्रिय खेलकुद परिषद् हातामा सम्पन्न प्रतियोगिताको खुला तौलसमूह फाइनलमा पुरुषतर्फ रुपक नेपालीले अमित महर्जनलाई पराजित गर्दै उपाधि उचाले। सोही स्पर्धामा रविन्द्र लोहार तेस्रो र शिवबहादुर भुजेल चौथो स्थानमा रहे। महिलातर्फ मन्जु विकले अनुपा नेपालीलाई हराउँदै स्वर्ण जित्दा कविता मोक्तान तेस्रो तथा चन्दाकुमारी भुजेल चौथो स्थानमा रहे।
प्रतियोगितामा शीर्ष चार स्थान हासिल गर्ने खेलाडीहरूले क्रमश ५० हजार, २५ हजार, १५ हजार र १० हजार नगद पुरस्कार प्राप्त गरे।
अन्य तौल समूहका प्रतिस्पर्धामा पनि रोमाञ्चक खेल देखिएको थियो। पुरुष ६५ केजी तौलसमूहमा सनी सिंहले स्वर्ण, मेघबहादुर राईले रजत, सागर तामाङले कांस्य जित्दा जयराज स्याङतान चौथो भए। पुरुष ६० केजीमुनि तौलसमूहमा अनिल बरामले स्वर्ण जिते भने केदार नेपालीले रजत, पवनकुमार जैसवालले कांस्य र राजेन्द्र घलानले चौथो स्थान प्राप्त गरे।
महिला ५० केजीमुनि तौलसमूहमा रिना माझीले स्वर्ण जित्दा उषा रावलले रजत, सपना आले मगरले कांस्य र निशा सुनारले चौथो स्थान हासिल गरे। त्यसैगरी, महिला ५५ केजीमुनि तौलसमूहमा अनिशा तामाङ स्वर्ण विजेता बनिन् भने लक्ष्मी थिङ दोस्रो, अन्जना बुढाथोकी तेस्रो र सविता आले मगर चौथो स्थानमा रहे।
मदन भण्डारी स्पोर्ट्स एकेडेमीको आयोजनामा सम्पन्न यो प्रतियोगिताले नयाँ प्रतिभा पहिचान गर्न महत्वपूर्ण भूमिका खेलेको आयोजकले जनाएको छ।
