रामेछाप, फागुन २ – १२औँ रामेछाप जिल्ला स्तरीय राष्ट्रपति रनिङ सिल्ड खेलकुद प्रतियोगिताको उपाधि मन्थली नगरपालिकाले जितेको छ। सदरमुकाम मन्थलीमा बुधबार सम्पन्न फाइनल खेलसँगै मन्थलीले २२ स्वर्ण, २३ रजत, र ३२ कांस्य पदक जित्दै कूल ७७ पदकसहित उपाधि उचालेको हो।
तीन दिनसम्म चलेको प्रतियोगितामा उमाकुण्ड गाउँपालिका २१ स्वर्ण, १२ रजत, र ११ कांस्य गरी ४४ पदकसहित दोस्रो स्थानमा रह्यो भने लिखु तामाकोसी गाउँपालिका ८ स्वर्ण, ६ रजत, र १२ कांस्यसहित २६ पदक जित्दै तेस्रो स्थानमा रह्यो।
जिल्ला खेलकुद विकास समिति रामेछापको आयोजनामा सम्पन्न प्रतियोगितामा दोरम्बा शैलुङ गाउँपालिका चौथो स्थानमा रह्यो। उसले ६ स्वर्ण, ९ रजत, र १८ कांस्य गरी ३३ पदक जित्यो। त्यसैगरी, रामेछाप नगरपालिकाले ५ स्वर्ण, ९ रजत, र १८ कांस्यसहित ३२ पदक हात पार्यो।
अन्य प्रतिस्पर्धीहरूमा खाँडादेवी गाउँपालिकाले ९, सुनापति गाउँपालिकाले ८, र गोकुलगंगा गाउँपालिकाले ६ पदक जितेका थिए।
प्रतियोगितामा उत्कृष्ट प्रदर्शन गर्ने टिमहरूलाई नगद पुरस्कारसहित सम्मान गरिएको थियो। विजेता मन्थली नगरपालिकाले नगद रु. ३०,०००, उपविजेता उमाकुण्डले रु. २०,०००, र तेस्रो स्थान प्राप्त लिखु तामाकोसीले रु. १०,००० नगद पुरस्कार, सिल्ड, मेडल, र प्रमाणपत्र प्राप्त गरे।
भलिबल, कबड्डी, एथलेटिक्स, तेक्वान्दो, उसु, कराँते लगायतका खेल समावेश गरिएको प्रतियोगितामा जिल्लाका २ नगरपालिका र ६ गाउँपालिकाका ७३९ जना खेलाडीले सहभागिता जनाएका थिए।
प्रतियोगिताको समापन कार्यक्रममा जिल्ला खेलकुद विकास समितिका अध्यक्ष सिताराम कार्कीले खेलाडीहरूको उत्कृष्ट प्रदर्शनको प्रशंसा गर्दै भविष्यमा यस्ता प्रतियोगिताहरूलाई अझ व्यवस्थित बनाउने प्रतिबद्धता व्यक्त गरे।
