काठमाडौं । स्वास्थ्य तथा जनसंख्या मन्त्रालयले स्वास्थ्य उपकरण खरिद प्रक्रियामा मन्त्रीको कुनै भूमिका नरहने स्पष्ट पारेको छ। केही अनलाइन मिडियाले स्वास्थ्य सेवा विभागद्वारा प्रक्रियामा रहेको उपकरण खरिदलाई स्वास्थ्य मन्त्री प्रदीप पौडेलसँग जोडेर अनावश्यक समाचार प्रकाशित गरेको भन्दै मन्त्रालयले प्रेस विज्ञप्ति जारी गरेको छ।
मन्त्रालयका प्रवक्ता डा. प्रकाश बुढाथोकीद्वारा जारी विज्ञप्तिमा सार्वजनिक खरिद ऐनअनुसार खरिद प्रक्रियामा सम्बन्धित विभागीय प्रमुख नै जिम्मेवार रहने उल्लेख गरिएको छ। कानून पालना नभएको अवस्थामा सो को जिम्मेवारी सम्बन्धित कर्मचारीको हुने प्रावधान स्पष्ट पार्दै मन्त्रालयले मन्त्री र पदाधिकारीमाथि निराधार आरोप लगाउनु पत्रकारिताको सिद्धान्त, मर्म र भावनाविपरीत रहेको बताएको छ।
मन्त्रालयले केही समययता अघि बढाइएका सुधारका कामलाई ओझेलमा पार्ने र जनमानसमा भ्रम सिर्जना गर्ने कार्य भइरहेको निष्कर्ष निकालेको छ। साथै, पत्रकारिताको सिद्धान्तअनुसार तथ्य र प्रमाणसहित निष्पक्ष समाचार प्रकाशन गर्न सञ्चारमाध्यमलाई आग्रह गरेको छ।
यसैबीच, स्वास्थ्य सेवा विभागले पनि छुट्टै विज्ञप्ति जारी गर्दै सार्वजनिक खरिद प्रक्रिया पूर्ण रूपमा सम्पन्न नभइसकेको अवस्थामा गलत समाचार प्रकाशन भएको भन्दै खरिद प्रक्रिया नियमानुसार अघि बढिरहेको स्पष्ट पारेको छ।
