काठमाडौं — एसियाली टेनिस महासंघ (एटीएफ) को सहयोग तथा नेपाल टेनिस संघको आयोजनामा ‘यङ टेनिस स्टार्स’ (YTS) कार्यक्रम बुधबार सातदोबाटोस्थित टेनिस कम्प्लेक्समा सफलतापूर्वक सम्पन्न भएको छ।
तीनदिने यस कार्यक्रममा काठमाडौं, पोखरा र चितवनका १५ जना प्रशिक्षकले सहभागिता जनाएका थिए। कार्यक्रमबारे जानकारी दिँदै नेपाल टेनिस संघका सचिव अजय विष्टले बालबालिकालाई प्रारम्भिक उमेरमै टेनिसमा कसरी आकर्षित गर्ने भन्ने विषयमा प्रशिक्षण केन्द्रित गरिएको बताए।
कार्यक्रममा ३ देखि १० वर्ष उमेरसमूहका बालबालिकालाई रमाइलो र प्रभावकारी विधिबाट टेनिसतर्फ प्रेरित गर्ने विविध अभ्यास, विधि र सिकाइका बारेमा सहभागी प्रशिक्षकले तालिम प्राप्त गरे।
प्रशिक्षण सत्र एटीएफका प्रशिक्षक माइक ब्यारेलले सञ्चालन गरेका थिए। समापन समारोहमा नेपाल टेनिस संघका अध्यक्ष मनोहरदास मुलले सहभागी प्रशिक्षकहरूलाई प्रमाणपत्र वितरण गरे।
