भक्तपुर – भक्तपुर जिल्लामा डजबल खेलको विकास र विस्तारका लागि भक्तपुर जिल्ला डजबल संघको तदर्थ समिति गठन गरिएको छ।
समितिको गठन कार्यक्रममा भक्तपुर जिल्ला खेलकुद विकास समितिका अध्यक्ष राजु थापा प्रमुख अतिथि र नेपाल डजबल महासंघ तदर्थ समितिका संयोजक अरुण तिमल्सिना विशेष उपस्थितिमा आइतवार सात सदस्यीय समिति गठन गरिएको हो।
समितिको नेतृत्वमा राजेन्द्र कुमार मिश्र अध्यक्ष, सरोज बस्नेत उपाध्यक्ष, शृजना मिश्र सचिव र सलिना बस्नेत कोषाध्यक्ष रहेका छन्। सदस्यहरूमा लक्ष्मण सुनार, जिवन श्रेष्ठ र निरन्जन राउत रहेका छन्।
उक्त नवगठित समितिले जिल्लास्तरदेखि राष्ट्रिय तथा अन्तर्राष्ट्रिय स्तरसम्म डजबल खेललाई प्रवर्द्धन गर्ने, खेलाडी उत्पादन, प्रशिक्षण र प्रतियोगिता सञ्चालनमा सक्रिय भूमिका निर्वाह गर्ने लक्ष्य लिएको जनाएको छ। समितिले विशेषगरी विद्यालय स्तरदेखि नै खेलको विकास र विस्तार गर्ने योजना अघि सारेको छ। यसबारे समितिका अध्यक्ष राजेन्द्र कुमार मिश्रले डजबललाई आधारभूत तहबाटै सुदृढ पार्दै भविष्यमा अन्तर्राष्ट्रिय प्रतिस्पर्धी खेलाडी उत्पादन गर्ने प्रतिबद्धता व्यक्त गरेका छन्।
