काठमाडौं। नेपालको महिला राष्ट्रिय फुटबल टोली एएफसी महिला एशियन कप २०२६ छनोट चरणको समूह ‘एफ’ अन्तर्गतको अन्तिम र निर्णायक खेलमा उज्वेकिस्तानसँग पेनाल्टी सुटआउटमा पराजित हुँदै प्रतियोगिताबाट बाहिरिएको छ।
निर्धारित ९० मिनेटको खेल ३–३ गोलको रोमाञ्चक बराबरीमा सकिएपछि खेलको निर्णय पेनाल्टीमार्फत गरिएको थियो, जहाँ नेपाल ४–२ ले पराजित भयो।
नेपालका लागि कप्तान सावित्रा भण्डारी ‘साम्बा’ ले ह्याट्रिक गर्दै तीनवटै गोल गरिन्। उज्वेकिस्तानका लागि खबीबुल्लाएभा, कराचिक र शोयिमोभाले समान रूपमा एक–एक गोल गरे।
समान अंक र गोलअन्तर रहेकाले अन्तिम खेल नै निर्णायक बनेको थियो। पेनाल्टीमा उज्वेकिस्तानले राम्रो प्रदर्शन गर्दै एएफसी महिला एशियन कप २०२६ का लागि अष्ट्रेलियाको यात्रा तय गर्यो भने नेपालको अभियान यहीं अन्त्य भएको छ।
यो हारसँगै नेपालले दोस्रोपटक एएफसी महिला एशियन कप खेल्ने अवसर गुमाएको हो।
