— भुटानको थिम्पु शहरमा सम्पन्न फोर नेसन्स कप बक्सिङ च्याम्पियनशिप २०२५ मा नेपालले उत्कृष्ट प्रदर्शन गर्दै चार स्वर्ण, तीन रजत र दुई कास्य पदक जित्न सफल भएको छ। ४ राष्ट्रको सहभागितामा भएको यस प्रतियोगितामा नेपाल दोस्रो स्थानमा रह्यो, जबकि भुटानले पहिलो स्थान हासिल गर्यो।
नेपालका ७ खेलाडी फाइनलमा पुगेका थिए, जसमा चार खेलाडीले स्वर्ण पदक जिते। महिला ५० केजी तौल समूहमा आरती बम्जनले भुटानकी जामो जिग्दाललाई ५-० अंकको अन्तरले हराउँदै नेपालका लागि पहिलो स्वर्ण जितिन्। महिला ५२ केजीमा अस्मिता दुवालले भुटानकी डेमो नोर्नुलाई ५-० अंकले हराएर नेपाललाई दोस्रो स्वर्ण दिलाइन्। महिला ५४ केजी तौल समूहमा वर्षा श्रेष्ठले भुटानकी लामो तासीलाई ४-१ अंकको अन्तरले पराजित गर्दै नेपालका लागि तेस्रो स्वर्ण जितिन्।
पुरुष ५१ केजी तौल समूहमा लक्ष्मण राईले भारतका कृष्ण कैलाश राईलाई ५-० अंकको अन्तरले हराउँदै स्वर्ण पदक जिते।
नेपालका अन्य खेलाडीहरूले पनि उत्कृष्ट प्रदर्शन गरे। पुरुष ४८ केजी तौल समूहमा लालप्रसाद उप्रेती भुटानका दोर्जे मगरसँग ४-१ अंकको अन्तरले पराजित भइ रजत पदक जिते। पुरुष ५४ केजी तौल समूहमा चन्द्रबहादुर थापाले बंगलादेशका महोमद उन्सोवसँग ३-२ अंकको अन्तरले पराजित भइ रजत पदक हात पारे। चन्द्रले सेमिफाइनलमा भारतका खेलाडीलाई ५-० ले हराएर फाइनलमा स्थान बनाएका थिए।
प्रतियोगितामा नेपालबाट मुख्य प्रशिक्षक ओलम्पियन प्रविन तुलाधर, आईबा थ्री स्टार कोच दीपक महर्जन, र सहयोगी प्रशिक्षक उमेश कटुवाल र सन्दिप श्रेष्ठ उपस्थित थिए। नेपालबाट टेक्निकल डेलिगेटको रूपमा पुष्करराज पन्तको नेतृत्वमा प्रतियोगिता सञ्चालन भएको थियो। रेफ्री र जजको भूमिकामा आईबा थ्री स्टार रेफ्री- जज धनकुमार मैनाली, टु स्टार रेफ्री- जज सन्तोष आले मगर, वान स्टार रेफ्री- जज अनुराधा लामा, जिवन कवां र राजकुमार महर्जनले निर्णायकको भूमिका निर्वाह गरे। नेपालबाट असिम न्यौपानेले स्कोरिङ अपरेटरको भूमिका निभाए।
यस सफलतासँगै नेपाल बक्सिङ महासंघले आगामी प्रतियोगिताहरूमा थप सफलता प्राप्त गर्नका लागि खेलाडीहरूको प्रोत्साहन र सशक्त प्रशिक्षणमा ध्यान दिनेछ।
