काठमाडौं। तेजस्वी एकेडेमी र बेल्मन्ट इन्टरनेसनल स्कुलले आठौं संस्करणको टप्स अन्तरविद्यालय बास्केटबल प्रतियोगितामा उपाधि जितेका छन्। तेजस्वीले सिनियर ब्वाइजतर्फ र बेल्मन्टले सिनियर गल्र्सतर्फ च्याम्पियन बन्न सफल भए।
प्रतियोगिता बिहीबार तार्केश्वर नगरपालिका १, साङलास्थित ल्यान्डमार्क एकेडेमीमा भएको थियो। सिनियर ब्वाइजको फाइनलमा तेजस्वीले गण्डकीलाई ४३–३० ले हराउँदै उपाधि जिते। तेजस्वीका विराज गुरुङले १२ अंक जोडेर टिमको जितमा महत्वपूर्ण योगदान पुर्याए।
सिनियर गल्र्सको फाइनलमा बेल्मन्टले ल्यान्डमार्कलाई १३–११ ले पराजित गर्दै उपाधि जितेको हो। बेल्मन्टकी जेशिका गुरुङले ७ अंक जोडेर टिमको जितमा प्रमुख भूमिका खेलिन्। नवोदितले बेल्मन्टलाई २५–१३ ले हराउँदै तेस्रो स्थानमा आफ्नो स्थान बनायो। नवोदितका आदेश बगालेले १२ अंक जोडेर उत्कृष्ट प्रदर्शन गरे।
सिनियर ब्वाइजको मोस्ट भ्यालुएबल प्लेयर (MVP) तेजस्वीका दिपेन छन्त्याल घोषित भए भने, सिनियर गल्र्सको MVP बेल्मन्टकी समिक्षा पुन मगरलाई प्रदान गरियो। सिनियर ब्वाइजमा तेजस्वीका आयुश अधिकारी ५७ अंकसहित सर्वाधिक स्कोरकर्ता बने, जबकि सिनियर गल्र्समा ल्यान्डमार्ककी सगुनी देवकोटा ३२ अंकसहित अग्रस्थानमा रहे।
उपाधि जितेका टिमलाई काठमाडौं प्याब्सनका अध्यक्ष नवराज भट्ट, तार्केश्वर नगरपालिका वडा १ का अध्यक्ष विदुर सापकोटा, टप्सका अध्यक्ष भरतमणि पोखरेल, ल्यान्डमार्ककी प्रिन्सिपल सुष्मा श्रेष्ठ र टप्सका सीईओ को-ओर्डिनेटर थिरबहादुर बस्नेतलगायतका प्रमुख व्यक्तिहरूद्वारा सम्मानित गरियो।
यो चार दिने प्रतियोगितामा सिनियर ब्वाइजमा १४ र सिनियर गल्र्समा १० टिमले प्रतिस्पर्धा गरेका थिए।
