काठमाडौं । लोकतान्त्रिक समाजवादी पार्टी (लोसपा) को बिमतीपछि सरकारले भूमि सम्बन्धि नेपाल ऐन संशोधन गर्न ल्याएको अध्यादेशमा समेटिएका त्रुटिहरू सच्याउन कार्यदल गठन गर्ने निर्णय गरेको छ।
पार्टीका महासचिव डा. सुरेन्द्र झाले सामाजिक सञ्जाल फेसबुकमार्फत आफूले साझा गरेको जानकारी अनुसार, अध्यक्ष महन्थ ठाकुरको अडान, विश्वसनीयता र प्रभावकारी नेतृत्वको कारण कार्यदल गठन गर्ने र अन्य पाँचवटा अध्यादेशलाई अगाडि बढाउने निर्णय भएको बताए।
उनले सत्ता गठबन्धनका सबै दलहरू एकजुट भएर अध्यादेश र अन्य चुनौतीहरूको सामना गर्न सहमति जनाएको उल्लेख गरेका छन्।
यसका साथै, लोसपा नेपालले उठाएका महत्वपूर्ण विषयहरू, विशेषत: मधेशका भूमिहीन नागरिकहरूको भूमी र आवासको सुनिश्चितता, सार्वजनिक जग्गाको संरक्षण, वन क्षेत्र र चूरे क्षेत्रको संरक्षण, जैविक विविधताको जगेर्ना र अन्य मुद्दाहरूलाई कार्यदलमा समेट्ने कुरामा सरकारले विश्वास व्यक्त गरेको छ।
त्यसैगरी, सरकारले भूमि सम्बन्धि अध्यादेशलाई तत्काल अघि नबढाउने निर्णय गरेको जनाएको छ।
