रौतहट, १५ फागुन – रौतहट जिल्लामा दुई चरणमा सञ्चालन गरिएको एचपिभी खोप अभियानको पहिलो चरण सफलतापूर्वक सम्पन्न भएको छ। पहिलो चरणमा फतुवा विजयपुर, मौलापुर, बौधीमाई, गढीमाई, कटहरिया, देवाही गोनाही, राजपुर, परोहा र इशनाथ नगरपालिकामा खोप लगाइँदा ९० प्रतिशतको लक्ष्यलाई पार गर्दै १०० प्रतिशत लक्ष्य हासिल गरिएको छ।
दोस्रो चरण माघ ३० गतेदेखि फागुन ६ सम्म विभिन्न नगरपालिका र गाउँपालिकामा चलिरहेको छ। यसमा गौर, राजदेवी, माधवनारायण, गरुडा वृन्दावन, गुजरा र चन्द्रपुर नगरपालिकासहित दुर्गा भगवती र यमुनामाई गाउँपालिकामा किशोरीलाई एचपिभी खोप प्रदान गरिने छ।
जिल्ला जनस्वास्थ्य कार्यालय गौरका खोप निरीक्षक एवं फोकल पर्सन अनिल कर्णका अनुसार पहिलो चरणमा निर्धारित लक्ष्य १०० प्रतिशत पूरा भएको छ र दोस्रो चरण पनि सफल हुनेमा उनी आशावादी छन्। पहिलो चरणका अनुसार फतुवा विजयपुर नगरपालिकामा २,३८९, मौलापुर नगरपालिकामा २,४७४, गढीमाई नगरपालिकामा २,९९७, कटहरिया नगरपालिकामा २,४१३ किशोरीलाई खोप लगाइयो।
बौधीमाई नगरपालिकाले लक्षभन्दा बढी १२२.२२ प्रतिशत लक्ष्य हासिल गरेको छ। सो नगरपालिकामा २,०३२ लक्ष्यमा २,३८२ किशोरीलाई खोप लगाइएको छ।
यस खोप अभियानले विद्यालय जाने कक्षा ६ देखि १० सम्मका छात्रा र विद्यालय बाहिरका १० देखि १४ वर्षसम्मका किशोरीलाई पाठेघरको मुखको क्यान्सरबाट जोगाउन निःशुल्क खोप प्रदान गर्दै छ। यस अभियानको अन्तर्गत ४९ हजार २६९ किशोरीलाई एचपिभी खोप लगाउने लक्ष्य राखिएको छ, जसमा ३९ हजार विद्यार्थी र १० हजार बाहिरका किशोरी समावेश छन्।
