मकवानपुर। मकवानपुरको बागमती गाउँपालिकामा आयोजना हुने सातौं बागमती गोल्डकप राष्ट्रिय फुटबल प्रतियोगिता शनिबारदेखि सुरु हुँदैछ। बागमती गाउँपालिका, झुरझुरे स्थित सहिद स्मृति रंगशालामा हुने उद्घाटन खेलमा मोफसलको बागमती युथ क्लब सर्लाही र बागमती गाउँपालिका खेलकुद विकास समिति प्रतिस्पर्धा गर्नेछन्।
प्रतियोगितामा ए डिभिजन क्लबहरूमध्ये डिफेन्डिङ च्याम्पियन मछिन्द्र फुटबल क्लब, संकटा क्लब, थ्री स्टार क्लब, त्रिभुवन आर्मी, एफिएफ क्लब, र चर्च ब्वाईज क्लबले प्रतिस्पर्धा गर्नेछन्। आयोजक बागमती गाउँपालिका सहित मोफसलका थप तीन क्लबहरू समेत प्रतियोगितामा सहभागी हुनेछन्।
प्रतियोगिताको विजेता टोलिले नगद १० लाख रुपैयाँ पुरस्कारका साथ ट्रफी प्राप्त गर्नेछ भने उपविजेताले ५ लाख नगद पुरस्कार जित्नेछ। सर्वोत्कृष्ट खेलाडीलाई नगद १ लाख १ हजार रुपैयाँ प्रदान गरिनेछ भने प्रत्येक विधागत उत्कृष्ट खेलाडीले २५ हजार रुपैयाँ प्राप्त गर्नेछन्। साथै, हरेक खेलको म्यान अफ द म्याच खेलाडीलाई १० हजार रुपैयाँ पुरस्कार दिइनेछ।
आयोजक समितिले प्रतियोगिता सम्पन्न गर्न ७३ लाख रुपैयाँ खर्च हुने अनुमान गरेको छ। सो रकम व्यवस्थापनका लागि गाउँपालिकाले ३० लाख रुपैयाँ बजेट विनियोजन गरेको छ भने बाँकी रकम आयोजक समितिले अन्य स्रोतहरूबाट व्यवस्थापन गर्ने जनाएको छ।
प्रतियोगिताले नेपाली फुटबलमा नयाँ उत्साह थप्ने विश्वास गरिएको छ।
