काठमाडौं। छैटौँ मेयर कप तथा १०औं केभिन रोहन स्मृति उपत्यकाव्यापी कराते च्याम्पियनशिप र तेस्रो क्योकुशिन अलाइट अन्तर्राष्ट्रिय कराते प्रतियोगिता माघ २३ र २४ गते दक्षिणकाली नगरपालिका–१, चाल्नाखेलमा आयोजना हुने भएको छ।
दुईदिने प्रतियोगितामा पुरुष र महिला गरी विभिन्न तौलसमूहमा नेपाली तथा विदेशी खेलाडीको सहभागिता रहनेछ। नेपालका सातै प्रदेशका खेलाडीहरू विभिन्न डोजोबाट सहभागी हुनेछन् भने भारत, अस्ट्रेलिया र बंगलादेशका खेलाडीहरूको समेत सहभागिता रहने आयोजकले जनाएको छ। प्रतियोगितामा करिब २०० खेलाडी सहभागी गराउने लक्ष्य लिइएको छ।
प्रतियोगिताअन्तर्गत छैटौँ मेयर कप राष्ट्रिय कराते च्याम्पियनशिप, दशौँ केभिन रोहन मेमोरियल च्याम्पियनशिप तथा डान टेस्ट कार्यक्रम २०२६ समावेश गरिएको छ। विजयी खेलाडीहरूलाई सिल्ड, मेडल, प्रमाणपत्र तथा नगद पुरस्कार प्रदान गरिनेछ भने सहभागी सबै खेलाडीलाई सम्मानस्वरूप मेडल वितरण गरिनेछ।
प्रतियोगिताको व्यवस्थापनका लागि विभिन्न संयोजक तोकिएका छन्। मञ्च व्यवस्थापनमा दिलबहादुर नगरकोटी र रघुवर नेपाल, अतिथि सत्कारमा लिला थापा मगर, भोजन व्यवस्थापनमा दिनेश कुमार नगरकोटी, प्रचार–प्रसार तथा स्वयंसेवक परिचालनमा राजेश तामाङ र कार्यक्रम संयोजनमा रामकुमार नगरकोटी रहनेछन्।
