काठमाडौं।
एथलेटिक्स परिवार नेपालको संयोजनमा गत महिना मित्रराष्ट्र भारतको रांचीमा सम्पन्न साफ एथलेटिक्स च्याम्पियनसिपमा नेपालका लागि पदक जित्दै राष्ट्रिय कीर्तिमान कायम गर्ने तथा उदयीमान एथलेटिक्स खेलाडीहरूलाई युवा तथा खेलकुद मन्त्री बव्लु गुप्ताले प्रोत्साहन स्वरूप खेल सामग्री वितरण गर्नुभएको छ।
त्रिपुरेश्वरस्थित दशरथ रंगशालामा आयोजित कार्यक्रममा बेलायतस्थित नेपाल रन यूके बाट प्राप्त खेल सामग्री प्रदान गरिएको हो।
उक्त अवसरमा ५,००० मिटर र १०,००० मिटर दौडमा दुई कांस्य पदक जित्दै नयाँ राष्ट्रिय कीर्तिमान कायम गर्ने धादिङकी सन्तोषी श्रेष्ठ, लङजम्पमा नयाँ राष्ट्रिय कीर्तिमान कायम गर्ने नेपाली सेनाका सलिम देवान, नेपाल प्रहरीकी सीमाकुमारी चौधरीसहित उदयीमान खेलाडीहरू नेपाली सेनाकी पूर्णलक्ष्मी न्यौपाने र निसा कार्की, गण्डकी प्रदेशकी नारायणी भण्डारी तथा बागमती प्रदेशकी मिङमार सिंह तामाङलाई खेल सामग्री प्रदान गरिएको थियो।
एथलेटिक्स परिवार, नेपालका अध्यक्ष राजन खत्रीका अनुसार यस्ता कार्यक्रमले खेलाडीको मनोबल उच्च बनाउने र अन्तर्राष्ट्रिय प्रतियोगितामा उत्कृष्ट प्रदर्शन गर्न थप प्रेरणा मिल्ने विश्वास लिइएको छ।
