काठमाडौं, असोज २६ – पाँचौं वडा अध्यक्ष कप भेट्रान फुटबल प्रतियोगितामा चावहिल स्पोर्ट्स क्लबका ‘ए’ र ‘बी’ दुवै टोली क्वार्टरफाइनलमा प्रवेश गरेका छन्।
चावहिल ‘ए’ ले आइतबार कपन भेट्रानलाई टाइब्रेकरमा २–१ गोलले पराजित गर्दै अन्तिम आठमा स्थान बनायो। खेलमा चावहिलका ‘म्यान अफ द म्याच’ राजेश शाही र दीपक लामाले गोल गरे भने कपनका ओमले एक गोल फर्काए। सोही दिनको अर्को खेलमा चावहिल ‘ए’ ले सिन्धु स्पोर्ट्सलाई १–० गोलले पराजित गर्यो। खेलका ‘म्यान अफ द म्याच’ सगुन श्रेष्ठले निर्णायक गोल गरे।
चावहिल ‘बी’ ले भने डिफेन्डिङ च्याम्पियन बौद्ध भेट्रानलाई २–१ गोलले हरायो। विजेताका ‘म्यान अफ द म्याच’ टीकाराम कार्की र विक्रम कार्कीले गोल गरे भने बौद्धका उमेश लामाले एक गोल फर्काए।
त्यस्तै, फ्रिडम फाइटर ‘बी’ पनि क्वार्टरफाइनलमा प्रवेश गर्न सफल भयो। चावहिलमै जारी प्रतियोगितामा फ्रिडम ‘बी’ ले एजे भेट्रानलाई २–१ गोलले पन्छायो। विजयी टोलीका लागि ‘म्यान अफ द म्याच’ कन्या गुरुङ र राजु तामाङले गोल गरे भने एजेका राजन उप्रेतीले सान्त्वना गोल गरे।
प्रतियोगिताको क्वार्टरफाइनल समीकरण तय भइसकेको छ। सोमबार हुने खेलमा चावहिल ‘ए’ ले बुटवल भेट्रानसँग प्रतिस्पर्धा गर्नेछ भने चावहिल ‘बी’ ले कैलाली भेट्रानविरुद्ध खेल्नेछ। अन्य दुई क्वार्टरफाइनलमा बानेश्वर फ्रेन्डसिपले चितवन भेट्रान र फ्रिडम ‘बी’ ले हेटौंडा भेट्रानसँग प्रतिस्पर्धा गर्नेछन्।
