काठमाडौं – मलेसियाको सेलाङ्गोरमा जारी एसीसी पुरुष यू–१६ इस्ट जोन कप क्रिकेट प्रतियोगितामा नेपालले आइतबार इन्डोनेसियामाथि ३७० रनको विशाल अन्तरले जित दर्ता गर्दै प्रतियोगितामा लगातार तेस्रो जित हासिल गरेको छ। यो जितसँगै नेपाल समूह ‘ए’ को शीर्ष स्थानमा उक्लिएको छ।
इन्डोनेसियासँगको खेलमा टस हारेर पहिले ब्याटिङ गर्न आएको नेपालले निर्धारित ५० ओभरमा ५ विकेटको क्षतिमा ४२० रन बनायो। नेपालको पारीमा प्रसिद्ध महराले उत्कृष्ट प्रदर्शन गर्दै १३२ रनको शानदार शतक प्रहार गरे। उनले ११५ बलमा १५ चौका र १ छक्का प्रहार गरेका थिए। यस्तै परिमार्जन यादवले २८ बलमा ७१ रन, रौनक श्रीवास्तवले ७१ बलमा ८८ रन, जोय थापाले ४१ बलमा ५७ रन तथा सुगम बुढाथोकीले ३९ रन बनाए।
४२१ रनको विशाल लक्ष्य पछ्याउन मैदानमा उत्रिएको इन्डोनेसियाको पारी सुरुदेखि नै धरासायी भयो। कप्तान विपिन शर्माको घातक बलिङको अगाडि इन्डोनेसियाली ब्याट्सम्यानहरू लामो समय टिक्न सकेनन्। विपिनले ७.३ ओभरमा २ मेडनसहित १२ रन खर्चिएर ६ विकेट लिए। बलिङ आक्रमणमा अन्य नेपाली बलरहरूले पनि सशक्त साथ दिँदै विपक्षी टोलीलाई २४.३ ओभरमै जम्मा ५० रनमा समेट्न सफल भए।
यस जितसँगै नेपालले समूह चरणमा ३ खेलबाट ६ अंक जोडेको छ र अब सेमिफाइनल पुग्ने दिशामा मजबुत स्थितिमा पुगेको छ। प्रतियोगितामा नेपालसहित १० टोली सहभागी छन्, जसलाई दुई समूहमा विभाजन गरिएको छ। नेपालले यसअघि खेलेका दुई खेलहरूमा पनि उत्कृष्ट प्रदर्शन गर्दै जित हात पारेको थियो।
नेपाल यू–१६ टोलीको यो जितले युवा खेलाडीहरूको सम्भावना झल्काउँछ र भविष्यका लागि उत्साहजनक संकेत प्रदान गर्दछ।
