काठमाडौं। श्रोत अभावका कारण सञ्चालनमा आउन नसकेका आधारभूत अस्पतालहरू आगामी साउन महिनादेखि सञ्चालनमा ल्याउने तयारी भइरहेको छ। स्वास्थ्य तथा जनसंख्या मन्त्री प्रदीप पौडेलले यसका लागि आवश्यक कार्ययोजना अघि बढाएका छन्।
देशभर निर्माण सम्पन्न भइसकेका तर हालसम्म सञ्चालनमा नआएका वा आंशिक रूपमा मात्रै सञ्चालन भइरहेका ५७ वटा अस्पताल रहेका छन्। साथै, नयाँ आर्थिक वर्षमा थप आधारभूत अस्पताल निर्माण गर्ने सरकारको योजना पनि छ।
मापदण्डको स्पष्टता नहुँदा अस्पताल सञ्चालनमा समस्या देखिएपछि सरकारले ५, १० र १५ शैय्याका अस्पताल सञ्चालन गर्नका लागि नयाँ आधारभूत अस्पताल सञ्चालन मापदण्ड २०८२ तयार गरिसकेको छ। सोही मापदण्डका आधारमा संघ सरकारले जनशक्ति, उपकरण, औषधी, र रिएजेन्टसहितका आवश्यक स्रोत व्यवस्थापन गर्नेछ।
मन्त्री पौडेलले यो कार्यलाई प्रभावकारी रूपमा अगाडि बढाउन नीति, योजना तथा अनुगमन महाशाखा प्रमुख डा. कृष्णप्रसाद पौडेलको संयोजकत्वमा विशेष कार्यदल गठन गरेका छन्। कार्यदलले संघ, प्रदेश र स्थानीय तहबीचको समन्वयमा स्पष्टता ल्याउने र कार्यान्वयनका लागि मार्गनिर्देशन गर्नेछ।
स्वास्थ्य मन्त्रालयका प्रवक्ता डा. प्रकाश बुढाथोकीका अनुसार, यस्ता अस्पतालको प्रभावकारी सञ्चालनका लागि आगामी आर्थिक वर्षमा करिब एक अर्ब रुपैयाँको बजेट विनियोजन गरिएको छ। यसले अस्पताल सञ्चालनमा उल्लेखनीय सहजता ल्याउने अपेक्षा गरिएको छ।
