काठमाडौं । आइसिसी विश्वकप लिग–२ अन्तर्गत बुधबार स्कटल्यान्डको डुन्डेस्थित फोर्थहिल क्रिकेट मैदानमा सम्पन्न खेलमा नेपालले नेदरल्यान्ड्सलाई पाँच विकेटले पराजित गर्दै महत्त्वपूर्ण जित दर्ता गरेको छ।
नेदरल्यान्ड्सले प्रस्तुत गरेको २२६ रनको लक्ष्य नेपालले ४७.१ ओभरमा पाँच विकेटको क्षतिमा पुरा गर्यो। यस जितसँगै नेपालले प्रतियोगितामा १४ खेलमा १० अंक जोड्दै लिग तालिकाको सातौँ स्थानमा उक्लिएको छ।
नेपालको जितमा आरिफ शेखले ७८ रनको अर्धशतकीय पारी खेले। उनले ९९ बलमा पाँच चौका प्रहार गरे। उपकप्तान दीपेन्द्र सिंह ऐरीले ५१ बलमा अविजित ३८ रन बनाउँदै आरिफसँग पाँचौँ विकेटका लागि ८९ रनको साझेदारी गरे, जसले जितमा निर्णायक भूमिका खेल्यो।
ओपनर कुशल भुर्तेलले ४२ बलमा २५ रन बनाए भने कप्तान रोहित पौडेलले ३९ बलमा २३ रन जोडे। अर्का ओपनर आसिफ शेखले २२ बलमा १९ रन बनाए। भीम सारकी २६ बलमा ११ रनमा आउट भए।
नेदरल्यान्ड्सका लागि माइकल लेभिटले २ विकेट लिए भने भिभियन किंग्मा र पल भान मेकरेनले एक/एक विकेट लिए।
त्यसअघि टस जितेर पहिले ब्याटिङ गरेको नेदरल्यान्ड्सले ४९.१ ओभरमा २२५ रनको योगफल तयार पारेको थियो। टोलीका लागि नोहा क्रोसले ५५ बलमा पाँच चौका सहित ४८ रन बनाए। कप्तान स्कट एडवार्ड्सले ७१ बलमा चार चौका प्रहार गर्दै ४६ रन जोडे। विक्रमजित सिंहले ३८ रन तथा ज्याक लायनले ३४ बलमा २७ रनको योगदान दिए।
नेपालका लागि सोमपाल कामीले सबैभन्दा बढी ३ विकेट लिए। करण केसी, ललित राजवंशी र सन्दीप लामिछानेले समान २/२ विकेट लिएर नेदरल्यान्ड्सको ब्याटिङ लाइनअपलाई दबाबमा राखेका थिए।
नेपालले अब लिगको आगामी खेलमा अंक तालिकामा सुधारको प्रयास गर्नेछ, जसले आइसिसी विश्वकप छनोट यात्रामा महत्वपूर्ण प्रभाव पार्न सक्छ।
