काठमाडौं– नेपाली तेक्वान्दो खेलाडी अदिश खड्का जापान र अस्ट्रेलियामा हुने अन्तर्राष्ट्रिय ओपन तेक्वान्दो च्याम्पियनसिपहरूमा प्रतिस्पर्धा गर्ने भएका छन्।
अदिशले यसै अप्रिलमा जापानको ओसाकामा हुने जापान वाटा ओपन र आगामी मे महिनामा अस्ट्रेलियाको गोल्ड कोस्टमा हुने गोल्ड कोस्ट ओपन तेक्वान्दो च्याम्पियनसिप मा सहभागिता जनाउने छन्। उनी दुवै प्रतियोगितामा पुरुष यू–१७ उमेर समूहको व्यक्तिगत पुम्से विधामा प्रतिस्पर्धा गर्नेछन्।
जापान वाटा ओपन अप्रिल २५ देखि २७ तारिखसम्म आयोजना हुँदैछ। यस प्रतियोगितामा अदिशसँगै नेपालका अन्य खेलाडीहरूको पनि सहभागिता रहनेछ। त्यसपछि अदिश जापानबाटै मे ३ र ४ गते हुने गोल्ड कोस्ट ओपन मा सहभागी हुन अस्ट्रेलिया प्रस्थान गर्नेछन्।
तेस्रो डान प्राप्त खेलाडी अदिश खड्काले दुबै प्रतियोगितामा उत्कृष्ट प्रदर्शन गर्दै नेपाललाई गौरव दिलाउने विश्वास व्यक्त गरेका छन्।
आइतबार जोरपाटीस्थित नामी इन्टरनेसनल कलेजले विशेष कार्यक्रमका बीच अदिशलाई बिदाइ गरेको थियो। कार्यक्रममा कलेजकी प्रिन्सिपल अनिशा पाण्डे लगायत शिक्षक तथा विद्यार्थीहरूको उपस्थिति रहेको थियो। कलेजले अदिशको सफलताको शुभकामना व्यक्त गर्दै उनीप्रति गर्व व्यक्त गरेको छ।
