रामेछाप। उमाकुण्ड गाउँपालिकाको आयोजना र ३ नं. वडा कार्यालयको सहप्रायोजनमा सम्पन्न अन्तरपालिका खुला पुरुष र महिला भलिबल प्रतियोगितामा गोकुलगंगा गाउँपालिका, रामेछापले पुरुषतर्फ र मानेभञ्ज्याङ गाउँपालिका, ओखलढुङ्गाले महिला तर्फ उपाधि जितेका छन्। प्रतियोगिता चैत २८ गतेदेखि ५ दिनसम्म उमाकुण्ड गाउँपालिका–३ को धोबीटार खेल मैदानमा आयोजना भएको थियो।
पुरुषतर्फको फाइनल खेलमा गोकुलगंगा गाउँपालिकाले लिखुपिके गाउँपालिका, गोली सोलुखुम्बुलाई हराउँदै १ लाख नगद, कप, मेडल र प्रमाणपत्रसँगै उपाधि जित्यो। उपविजेता बनेको लिखुपिके गाउँपालिका ७० हजार नगद, कप, मेडल र प्रमाणपत्र प्राप्त गर्यो। तेस्रो स्थानको खेलमा लिखु तामाकोशी गाउँपालिकाले खाँडादेवी गाउँपालिकालाई पराजित गर्दै नगद ५० हजार र पुरस्कार प्राप्त गर्यो।
महिला तर्फ, मानेभञ्ज्याङ गाउँपालिकाले विगु गाउँपालिका, दोलखालाई हराउँदै १ लाख नगद, कप, मेडल र प्रमाणपत्र जितेको छ। उपविजेता विगु गाउँपालिकाले ७० हजार नगद र तेस्रो स्थानको आमचोक गाउँपालिकाले ५० हजार नगद प्राप्त गरेको छ।
प्रतियोगितामा उत्कृष्ट खेलाडीहरूको सम्मान पनि गरिएको थियो। पुरुषतर्फ, लिखुपिके गाउँपालिकाका विष्णु बस्नेतलाई उत्कृष्ट खेलाडी र रूपेश बस्नेतलाई उत्कृष्ट सेटरको पुरस्कार प्राप्त भयो। गोकुलगंगा गाउँपालिका, रामेछापका विवेक कार्की उत्कृष्ट ब्लकर, सुजन खड्का उत्कृष्ट स्पाइकर र आदित्य श्रेष्ठ उत्कृष्ट लिब्रो घोषित भए। महिला तर्फ, मानेभञ्ज्याङ गाउँपालिकाकी चन्द्रकुमारी बस्नेत उत्कृष्ट खेलाडी घोषित भइन्। अन्य विधामा सुस्मिता नेपाली (विगु गाउँपालिका) उत्कृष्ट स्पाइकर, मनीषा राई (मानेभञ्ज्याङ) उत्कृष्ट सेटर र रेश्मी राई (मानेभञ्ज्याङ) उत्कृष्ट ब्लकर बनिन्।
यो प्रतियोगिता १६ टिमको सहभागितामा सम्पन्न भएको थियो। पुरुष तर्फ ९ र महिला तर्फ ७ टिमले प्रतिस्पर्धा गरेका थिए। प्रतियोगिताको उद्घाटन गाउँपालिका अध्यक्ष शेरबहादुर सुनुवारले गरेका थिए भने विजयी खेलाडीलाई वडाध्यक्ष गुणकुमार थापाले पुरस्कार वितरण गरेका थिए।
