पोखरा, नेपाल – पोखरामा जारी दोस्रो संस्करणको केपी ओली कप राष्ट्रिय पुरुष टी२० क्रिकेट प्रतियोगिता अन्तर्गत मंगलबार (११औं दिन) समूह ‘डी’ का दुई खेल सम्पन्न भए, जसमा अत्तरिया क्रिकेट एकेडेमी र मालपोखरी क्रिकेट क्लब विजयी बने।
पोखरा रंगशालास्थित मैदानमा भएको पहिलो खेलमा अत्तरिया क्रिकेट एकेडेमीले होरिजोन क्रिकेट क्लबलाई ४ विकेटले पराजित गर्यो।
पहिले ब्याटिङ गर्दै होरिजोनले १९.१ ओभरमा १० विकेट गुमाउँदै १४० रन बनायो। होरिजोनका लागि कमल विष्टले ३९ रन, विप्रस केसीले ३५ रन (नटआउट), र नरबहादुर सार्कीले २७ रन बनाए। अत्तरियाका लागि बसन्त खत्री र भोजराज भट्टले समान ३ विकेट लिए, जबकि सुशिल साउदले २ विकेट हात पारे।
१४१ रनको लक्ष्य पछ्याउँदै अत्तरियाले १८.२ ओभरमा ६ विकेट गुमाउँदै लक्ष्य पुरा गर्यो।
टेक रावतले उत्कृष्ट प्रदर्शन गर्दै ४२ बलमा ६१ रनको अविजित पारी खेले र प्लेयर अफ द म्याच घोषित भए।
समूह ‘डी’ दोस्रो खेलमा मालपोखरी क्रिकेट क्लबले सुन्दर हरैचा क्रिकेट क्लबलाई ४ विकेटले पराजित गर्यो।
पहिले ब्याटिङ गर्दै सुन्दर हरैचाले २० ओभरमा १२८ रन बनायो। समिर कार्कीले सबैभन्दा बढी ३१ रन जोडे। मालपोखरीका लागि सिराज हवारी र जितेश मण्डलले समान २–२ विकेट लिए।
१२९ रनको लक्ष्य पछ्याउँदै मालपोखरीले १७.३ ओभरमा ६ विकेट गुमाएर लक्ष्य हासिल गर्यो। विजय गुप्ताले ४६ बलमा ५९ रन बनाए र प्लेयर अफ द म्याच घोषित भए।
२ खेलमा लगातार जित निकालेको अत्तरिया ४ अंकका साथ समूह ‘डी’को शीर्ष स्थानमा उक्लिएको छ। होरिजोन २ खेलमा १ जित र १ हारसहित २ अंकका साथ दोस्रो स्थानमा छ, जबकि मालपोखरी तेस्रो स्थानमा रहेको छ। सुन्दर हरैचा २ खेलमा लगातार हारसहित तालिकाको पुछारमा छ।
समूह चरणको अन्तिम खेल भोलि हुने छ, जहाँ होरिजोनले सुन्दर हरैचासँग र अत्त्रियाले मालपोखरीसँग प्रतिस्पर्धा गर्नेछ। समूह विजेता अन्तिम चारमा प्रवेश गर्नेछ।
