पोखरा, गण्डकी — गण्डकी प्रदेशमा डजबल खेललाई संस्थागत रूपमा विकास गर्ने उद्देश्यले गण्डकी प्रदेश डजबल संघको तदर्थ समिति गठन गरिएको छ। नवगठित समितिको अध्यक्षमा कृष्णप्रसाद लम्साल चयन भएका छन्।
तदर्थ समितिमा निर्मल पराजुली उपाध्यक्ष, अनुप बराल सचिव, शान्ता हमाल कोषाध्यक्षका रूपमा रहेका छन् भने प्रद्युम पराजुली, प्रकाश वान्ले, रेवती रमण पोख्रेल, विवेक राजीव पोख्रेल घर्ती र सुषमा आचार्य सदस्यका रूपमा चयन भएका छन्।
गण्डकी प्रदेश खेलकुद परिषदले उक्त समितिलाई तीन महिनाभित्र आवश्यक आन्तरिक संरचना तयार पार्ने, नियमावली निर्माण गर्ने र आगामी कार्ययोजना तय गर्ने जिम्मेवारी दिएको छ। साथै, डजबल खेललाई जिल्लास्तरदेखि स्थानीय तहसम्म विस्तार गर्ने, महिला र पुरुष खेलाडी छनोट गरी प्रतियोगिता सञ्चालन गर्ने र वित्तीय व्यवस्थापनको खाका तयार गर्ने निर्देशनसमेत प्रदान गरिएको छ।
यो समितिको गठनसँगै गण्डकी प्रदेशमा डजबल खेललाई व्यवस्थित, सशक्त र प्रतिस्पर्धात्मक रूपमा अघि बढाउने अपेक्षा गरिएको छ। खेलको विकास, जनस्तरसम्म पहुँच र खेलाडी उत्पादनमा यो समिति महत्वपूर्ण कदम सावित हुने विश्वास लिइएको छ।
