काठमाडौं – नेपालकी प्रभा आङदेम्बेले भारतको नयाँ दिल्लीस्थित जवाहरलाल नेहरु स्टेडियममा जारी विश्व पारा एथलेटिक्स ग्रान्ड प्रिक्स मा ऐतिहासिक उपलब्धि हासिल गर्दै महिला लङजम्प (टी–४७) स्पर्धामा रजत पदक जितेकी छन्।
प्रभाले ३.९६ मिटरको उत्कृष्ट फड्कासहित दोस्रो स्थान हासिल गरेकी हुन्। प्रशिक्षक विमला राना मगरका अनुसार उक्त स्पर्धामा श्रीलंकाली खेलाडीले स्वर्ण जिते।
यस प्रतियोगितामा प्रभाले तीन स्पर्धामा प्रतिस्पर्धा गर्ने लक्ष्य राखेकी थिइन्। लङजम्पमा रजत जितेपछि उनले ४ सय मिटर दौडमा चौथो स्थान हासिल गरिन्। अब उनले बिहीबार २ सय मिटर दौड मा प्रतिस्पर्धा गर्नेछिन्, जुन नेपाली समयअनुसार दिउँसो ३:१५ बजे हुनेछ।
प्रभाको यो सफलता नेपाली पारा खेलकुदका लागि महत्वपूर्ण उपलब्धि हो। नेपाली खेलकुदप्रेमीहरू उनका आगामी प्रदर्शनका लागि उत्साहित छन्।
