काठमाडौं – मिसन–२०२६ अन्तर्गत राष्ट्रिय खेलकुद परिषद् (राखेप) द्वारा सञ्चालन भइरहेको राष्ट्रिय टिम तयारी विशेष प्रशिक्षणमा संलग्न खेलाडी तथा प्रशिक्षकहरूले बिहीबार सातदोबाटोस्थित अन्तर्राष्ट्रिय खेलकुद परिसरमा होली पर्व उल्लासपूर्ण तरिकाले मनाए।
राखेपको आयोजनामा सम्पन्न यस विशेष कार्यक्रममा परिषद्का सदस्य–सचिव टंकलाल घिसिङ, विभिन्न खेलका खेलाडी, प्रशिक्षक, तथा राष्ट्रिय खेल संघका पदाधिकारीहरू सहभागी भए। एकआपसमा रंग दलेर शुभकामना साटासाट गर्दै उनीहरूले होलीको उमंग साझा गरे।
खेलाडीहरू प्रायः कडा प्रशिक्षणमा व्यस्त रहने भएकाले उनीहरूलाई मानसिक ताजगी र आत्मीयता बढाउने उद्देश्यले कार्यक्रम आयोजना गरिएको आयोजकले जनाएका छन्। खेल मैदानमा अनुशासन र मेहनतका साथ संघर्षरत खेलाडीहरूको दैनिकीमा यस पर्वले नयाँ उर्जा थपेको छ।
रंग र उत्साहको संगममा आयोजित यस उत्सवले खेलकुद समुदायमा आपसी सद्भाव र हौसला प्रदान गरेको सहभागीहरूको प्रतिक्रिया थियो।
