काठमाडौं – केपी ओली कप च्याम्पियनसिप फुटबल प्रतियोगिता आजबाट सुरू भएको छ। प्रधानमन्त्री केपी शर्मा ओलीको ७४औं जन्मदिनको अवसरमा, धूमधामसँग उद्घाटन गरिएको यो प्रतियोगिता फुटबल प्रेमीहरूको लागि ठूलो उत्सव बनेको छ।
उद्घाटन समारोहको विशेष आकर्षण थियो, ५० पाउन्डको विशाल केक, जसलाई प्रधानमन्त्री ओली र उनकी पत्नी राधिका शाक्यले काटेर उत्सवको माहोल थपे। राधिका शाक्यले केक खुवाएर ओलीलाई जन्मदिनको शुभकामना दिइन्।
यस विशेष समारोहमा वरिष्ठ हास्य कलाकार हरिवंश आचार्य, प्रख्यात गायक महेश काफ्ले, गायिका अस्मिता अधिकारी, समीक्षा अधिकारी लगायतका चर्चित कलाकारहरूको उपस्थितिले कार्यक्रमलाई थप रोचक बनायो।
प्रतियोगिता प्रारम्भसँगै खेल प्रेमी र समर्थकहरूले यसलाई उत्साहजनक स्वागत गरेका छन्। प्रतियोगिताको विजेताले रु १५,११,१११/- नगद, ट्रफी, प्रमाणपत्र र मेडल प्राप्त गर्नेछन्। उपविजेताले रु ५ लाख नगद, ट्रफी, प्रमाणपत्र र अन्य आकर्षक पुरस्कार प्राप्त गर्नेछन्।
यस पुरस्कारको व्यवस्था प्रतियोगिता र खेलाडीहरूको प्रयासलाई सम्मानित गर्ने र प्रतियोगितालाई अझ रोचक र प्रतिस्पर्धात्मक बनाउनको लागि गरिएको हो।
