काठमाडौं, फागुन ४ – राष्ट्रिय युवा संघ नेपालले तेस्रो संस्करणको ‘केपी ओली कप २०८१’ फुटबल प्रतियोगिता फागुन ११ देखि १९ गतेसम्म आयोजना गर्ने भएको छ। प्रतियोगिताका क्वार्टरफाइनलसम्मका खेलहरू अखिल नेपाल फुटबल संघ (एन्फा) कम्प्लेक्स, सातदोबाटोमा हुनेछन्। सेमिफाइनल खेलहरू फागुन १६ र १७ गते दशरथ रंगशाला, त्रिपुरेश्वरमा हुनेछ। फाइनल खेल फागुन १९ गते दशरथ रंगशालामै सम्पन्न हुनेछ।
शनिबार काठमाडौंमा आयोजित पत्रकार सम्मेलनमा आयोजकले प्रतियोगितासम्बन्धी विस्तृत जानकारी दिएको हो। आयोजकका अनुसार यो प्रतियोगिता नेपाली फुटबलको विकास र युवा खेलाडीहरूलाई अवसर प्रदान गर्न आयोजित गरिएको हो।
प्रतियोगितामा नेपालका ६ ‘ए डिभिजन’ क्लब, २ विदेशी टोली तथा १ आयोजक टोली गरी ९ टोली सहभागी हुनेछन्। प्रतियोगितामा सहभागी क्लबहरू एपीएफ एफसी, ब्ल्याक बुल्स एफसी, संकटा क्लब, त्रिभुवन आर्मी एफसी, नेपाल पुलिस क्लब, केपीएफसी, न्युरोड टिम, मच्छिन्द्र एफसी, तथा एफसी ट्रान्सपोर्ट युनाइटेड क्लब रहेका छन्।
प्रतियोगिताको विजेताले रु १५,११,१११/- नगद, ट्रफी, प्रमाणपत्र तथा मेडल प्राप्त गर्नेछ। प्रतियोगिताको उपविजेताले रु ५ लाख नगद, ट्रफी, प्रमाणपत्र तथा अन्य आकर्षक पुरस्कार प्राप्त गर्नेछ।
प्रतियोगितामा उत्कृष्ट प्रदर्शन गर्ने खेलाडीहरूलाई विभिन्न विधामा नगद पुरस्कार प्रदान गरिनेछ।
- उत्कृष्ट खेलाडीलाई रु १ लाख नगद प्रदान गरिनेछ।
- उत्कृष्ट गोलरक्षकलाई रु ५० हजार नगद प्रदान गरिनेछ।
- उत्कृष्ट गोलकर्तालाई रु ५० हजार नगद प्रदान गरिनेछ।
- उत्कृष्ट उदीयमान खेलाडीलाई रु ५० हजार नगद प्रदान गरिनेछ।
- प्रत्येक खेलको म्यान अफ द म्याचलाई रु १५ हजार नगद प्रदान गरिनेछ।
- हरेक खेलको विजेता टोलीलाई रु २५ हजार नगद प्रदान गरिनेछ।
प्रतियोगिताको उद्घाटन समारोहलाई आकर्षक बनाउन विभिन्न कलाकारहरूको प्रस्तुति रहनेछ। उद्घाटन कार्यक्रममा चर्चित गायकहरू बद्री पंगेनी, महेश काफ्ले, समिक्षा अधिकारी र अस्मिता अधिकारीको विशेष प्रस्तुति रहनेछ।
त्यस्तै, विश्व चर्चित इटालियन फुटबल लिजेन्ड जियानलुजी बुफनको समेत विशेष उपस्थिती रहनेछ। प्रतियोगिताको प्रमुख अतिथि वरिष्ठ कलाकार हरिवंश आचार्य हुनेछन्। प्रतियोगिताको विशेष अतिथि प्रधानमन्त्री तथा नेकपा (एमाले)का अध्यक्ष केपी शर्मा ओली रहनेछन्।
प्रतियोगिताको सम्पूर्ण खेलहरू कान्तिपुर टेलिभिजनमार्फत प्रत्यक्ष प्रसारण गरिनेछ। प्रतियोगिताका लागि खल्ती टिकेटिङ पार्टनर रहेको छ। साथै, अन्य विभिन्न सञ्चार माध्यमहरूबाट समेत प्रत्यक्ष प्रसारण गरिनेछ।
‘केपी ओली कप’ प्रतियोगिता युवा खेलाडीहरूलाई प्रोत्साहन गर्ने उद्देश्यले आयोजना गरिएको हो। प्रतियोगिताले नेपाली खेलाडीहरूको क्षमता विकास, अन्तर्राष्ट्रिय स्तरमा प्रतिस्पर्धा गर्ने अवसर, युवालाई खेलकुदमा आकर्षित गर्ने, आर्थिक सशक्तिकरण गर्ने तथा खेलकुदको माध्यमबाट समाजमा एकता कायम गर्ने लक्ष्य राखेको छ।
राष्ट्रिय युवा संघ नेपालले २०७९ सालदेखि ‘केपी ओली कप’ प्रतियोगिता आयोजना गर्दै आएको हो। आयोजकका अनुसार यो प्रतियोगिता नेपाली फुटबलको विकासमा महत्वपूर्ण योगदान पुर्याउने विश्वास गरिएको छ।
