काठमाडौं– चौथो क्योकुसिन तेजुका कप विश्व कराते च्याम्पियनसिपमा सहभागी हुन ५ सदस्यीय नेपाली टोली बुधबार जापान प्रस्थान गर्ने भएको छ। नेपालका तर्फबाट कातामा दावा शेर्पा र कुमुतेमा मनीष कार्कीले प्रतिस्पर्धा गर्नेछन्।
प्रतियोगिता फागुन ९ देखि १३ गतेसम्म जापानको सेन्डाइ र फुकुओकामा आयोजना हुनेछ, जहाँ नेपालका खेलाडी फुकुओकामा प्रतिस्पर्धा गर्नेछन्।
नेपाली टोलीमा नेपाल क्योकुसिन कराते (ईको) संघका अध्यक्ष दमन बस्नेत, महासचिव संगीत बस्नेत, र प्रशिक्षक रोशन कपाली छन्। साथै, अध्यक्ष बस्नेत निर्णायकको रूपमा पनि भूमिका निर्वाह गर्नेछन्।
मंगलबार आयोजित बिदाइ कार्यक्रममा कातामा दावा शेर्पा र कुमुतेमा मनीष कार्कीले करातेका केही डेमोन्स्ट्रेशन प्रस्तुत गरे। उनीहरूको उत्कृष्ट प्रदर्शनले उपस्थित दर्शक तथा अतिथिहरूलाई प्रभावित बनायो।
टोलीलाई शुभकामना दिँदै पूर्व उपप्रधानमन्त्री कमल थापाले सोमबार विशेष समारोहबीच बिदाइ गरे। उनले भने, “हामी हाम्रा खेलाडीहरूमा गर्व गर्छौं। प्रतियोगितामा उत्कृष्ट सफलता प्राप्त होस् र नेपालका लागि स्वर्ण पदक जितून् भन्ने शुभकामना व्यक्त गर्दछु।”
नेपाली टोलीको यो सहभागिता अन्तर्राष्ट्रिय स्तरमा क्योकुसिन करातेमा नेपालको पहिचान स्थापित गर्न महत्वपूर्ण अवसर हुने विश्वास गरिएको छ।
