बागमती – सातौं संस्करणको बागमती गोल्डकप राष्ट्रिय फुटबल प्रतियोगिता अन्तर्गत सशस्त्र प्रहरी बल (एपीएफ)ले विजयी सुरुवात गरेको छ। आइतबार बागमती-४ स्थित सहिद स्मृति रंगशालामा भएको खेलमा एपीएफले चितवनको हानामी बीएफसीलाई टाइब्रेकरमा ३-१ गोलले हराउँदै जित हासिल गर्यो।
निर्धारित खेल समय गोलरहित बराबरी भएपछि खेल टाइब्रेकरमा पुगेको थियो। टाइब्रेकरमा एपीएफका सुमन श्रेष्ठ, दिपेश धिमाल र मनि कुमार लामाले गोल गरे। जबकि बिएफसीका अमन लामो मात्र गोल गर्न सफल भए।
एपीएफका गोलरक्षक एन्जल श्रेष्ठको उत्कृष्ट प्रदर्शनले बिएफसीका रोशन क्षेत्री र सुरेश कुमालको प्रहारलाई बचायो भने विदेशी खेलाडी बफरको प्रहार बाहिरिएको थियो। एन्जल श्रेष्ठलाई म्यान अफ द म्याच घोषित गरिएको छ।
खेलको ६४औं मिनेटमा एपीएफका प्रदीप लामाले रातो कार्ड पाएर बाहिरिए पनि, एपीएफले निर्धारित समय आफ्नो पक्षमा पार्न सफल भयो। एपीएफ गत संस्करणको उपविजेता टिम हो।
प्रतियोगिता आगामी फागुन १२ गतेसम्म जारी रहनेछ, र उपाधि विजेताले १० लाख रुपैयाँ र उपविजेताले ५ लाख रुपैयाँ प्राप्त गर्नेछन्।
