इटहरी – जारी १५औं अन्तर्राष्ट्रिय आमन्त्रण इटहरी गोल्डकप फुटबल प्रतियोगितामा सगरमाथा युथ क्लब मोरङ सेमिफाइनलमा प्रवेश गरेको छ। आइतबार भएको दोस्रो क्वार्टरफाइनल खेलमा सगरमाथाले एनआरटी क्लब काठमाडौंलाई १-० गोल अन्तरले पराजित गर्दै अन्तिम चारमा स्थान सुरक्षित गर्यो।
खेलको ६औं मिनेटमै सगरमाथा युथ क्लबका विदेशी खेलाडी रिचर्डले निर्णायक गोल गर्दै टिमलाई सेमिफाइनलसम्म पुर्याए। उत्कृष्ट प्रदर्शन गरेका रिचर्ड म्यान अफ द म्याच घोषित भए।
प्रतियोगिताको तेस्रो क्वार्टरफाइनल खेल सोमबार झापा एघार फुटबल क्लब र मच्छिन्द्र फुटबल क्लब काठमाडौंबीच हुनेछ। इटहरीमा फागुन १० गतेसम्म चल्ने गोल्डकपको विजेताले नगद १० लाख रुपैयाँ, जबकि उपविजेताले ५ लाख रुपैयाँ पुरस्कार प्राप्त गर्नेछ। प्रतियोगिताको आयोजना राष्ट्रिय जागृती क्लब, इटहरीले गरेको हो।
