काठमाडौं । नेपालले उत्कृष्ट प्रदर्शन गर्दै थ्री बाई थ्री अन्तर्राष्ट्रिय बास्केटबल प्रतियोगिताको उपाधि आफ्नो नाममा लेखाउन सफल भएको छ । शनिबार त्रिपुरेश्वरस्थित कभर्डहलमा भएको रोमाञ्चक फाइनल खेलमा नेपालले भारतलाई २१–१७ को अन्तरले पराजित गर्दै ऐतिहासिक जित दर्ता गर्यो ।
विजय बुर्जाको कप्तानीमा रहेको नेपाली टोलीले प्रतियोगिताभर प्रभावशाली खेल प्रदर्शन गर्यो । कप्तान विजयसँगै मनिष केसी, निश्चल महर्जन र निकेश राखल मगरको उत्कृष्ट समन्वयले नेपाललाई च्याम्पियन बनाउन महत्त्वपूर्ण योगदान दियो । व्यक्तिगत रूपमा पनि उत्कृष्ट प्रदर्शन गरेका निकेश राखल मगर प्रतियोगिताको सर्वाेत्कृष्ट खेलाडी घोषित भए । उनले पुरस्कारस्वरूप २५० अमेरिकी डलर प्राप्त गरे ।
विजेता नेपालले १,२०० अमेरिकी डलर पुरस्कार हात पारेको छ भने उपविजेता भारतले ४०० डलरमा चित्त बुझाएको छ । फ्रिडम ग्लोबल नेटवर्क र राइभल नेसन्सको आयोजनामा सम्पन्न प्रतियोगितामा नेपाल, भारत र पाकिस्तानका टिमहरूले सहभागिता जनाएका थिए ।
डबल राउन्ड रोबिन प्रारूपमा शुक्रबार र शनिबार सम्पन्न खेलहरूमा नेपाल र भारत शीर्ष दुई स्थानमा रहँदै फाइनलमा प्रवेश गरेका थिए । उपाधि विजेता नेपाली टोलीलाई नेपाल बास्केटबल संघका अध्यक्ष भीमसिंह गुरुङलगायतका अतिथिहरूले पुरस्कृत गरेका थिए ।
नेपालको यस जितले देशको बास्केटबल क्षमतालाई अन्तर्राष्ट्रिय स्तरमा नयाँ पहिचान दिलाएको छ ।
