काठमाडौं । अखिल नेपाल फुटबल संघ (एन्फा)ले अन्तर्राष्ट्रिय महिला फुटबल प्रतियोगिताको सम्पूर्ण तयारी पूरा भएको जनाएको छ। सोमबारदेखि काठमाडौंको दशरथ रंगशालामा सुरु हुने यस प्रतिष्ठित प्रतियोगितामा नेपालसहित म्यानमार, लेबनान र किर्गिस्तानको सहभागिता रहनेछ।
प्रतियोगितामा सहभागी टिमहरू सबै नेपाल आइसकेका छन्, र उद्घाटन खेलमा नेपालले किर्गिस्तानको सामना गर्नेछ। नेपाली महिला फुटबल टिमका प्रमुख प्रशिक्षक राजेन्द्र तामाङका अनुसार किर्गिस्तान बलियो टोली भएकाले नेपालका लागि चुनौतीपूर्ण खेल हुने छ। उनले भने, “६ वर्षअघि किर्गिस्तानविरुद्ध ८-२ को सहज जित निकालेका थियौं, तर अहिले उनीहरूको फुटबलको स्तर सुधारिएको छ। हाम्रो टिमको मुख्य बलियो पक्ष भनेको संरचनागत खेल हो, जसलाई मजबुत बनाउँदै जित निकाल्ने योजना छ।”
यस्तै, नेपाली महिला टोलीकी कप्तान एन्जिला तुम्बापो सुब्बाले यो प्रतियोगिता नेपालका लागि ठूलो अवसर भएको बताइन्। “हामी उत्कृष्ट प्रदर्शन गर्दै प्रतियोगितामा सफल नतिजा निकाल्नेछौं। नेपाली समर्थकहरूको साथ हाम्रो लागि थप प्रेरणादायी हुनेछ,” उनले भनिन्।
अन्तर्राष्ट्रिय महिला फुटबल प्रतियोगिताले नेपाली खेलाडीहरूको क्षमता प्रदर्शन गर्न महत्वपूर्ण भूमिका खेल्नेछ। पहिलो खेलमा नेपालको प्रदर्शन कस्तो रहनेछ भन्ने चासो सबैलाई छ।
