काठमाडौं। स्वतन्त्र ऊर्जा उत्पादकहरूको संस्था इप्पान (Independent Power Producers’ Association Nepal – IPPAN) ले बुद्धभूमि नेपाल हाइड्रोपावर कम्पनीका अध्यक्ष पूर्णलाल श्रेष्ठलाई सल्लाहकारमा नियुक्त गरेको छ। इप्पानले आफ्नो विधानअनुसार जलविद्युत् क्षेत्रमा लामो समयदेखि योगदान पुर्याउँदै आएका श्रेष्ठलाई सल्लाहकारको जिम्मेवारी दिएको हो।
डेढ दशकभन्दा बढी समयदेखि जलविद्युत् क्षेत्रमा सक्रिय श्रेष्ठ हाल बुद्धभूमि नेपाल हाइड्रोपावर कम्पनी लिमिटेड, एबीपी इनर्जी प्राइभेट लिमिटेड, र एटलस इनर्जी प्राइभेट लिमिटेडका अध्यक्ष हुन्। साथै, उनी ह्याप्पी इनर्जी प्राइभेट लिमिटेडको सञ्चालक समिति सदस्यको जिम्मेवारीमा पनि छन्।
बुद्धभूमि नेपाल हाइड्रोपावरले नुवाकोटमा निर्माण गरेको ४.९९३ मेगावाट क्षमताको लोवर तादी जलविद्युत आयोजना २०७८ साल चैत १० गतेदेखि व्यावसायिक उत्पादनमा आएको छ।
त्यस्तै, एबीपी इनर्जीले नुवाकोटमै निर्माणाधीन ८ मेगावाट क्षमताको तादी घ्याङफेदी जलविद्युत आयोजना सम्पन्न गर्न लागिरहेको छ।
ह्याप्पी इनर्जीले संखुवासभामा ४० मेगावाट क्षमताको अप्पर संखुवाखोला आयोजना निर्माण गरिरहेको छ भने एटलस इनर्जीले ३०.२४ मेगावाट क्षमताको मध्य घुन्साखोला जलविद्युत आयोजना निर्माणको तयारी गरिरहेको छ।
इप्पानले ऊर्जा क्षेत्रमा विशेष योगदान पुर्याएका अग्रज ऊर्जा उद्यमी र विज्ञहरूलाई सल्लाहकारको रूपमा मनोनयन गर्ने प्रचलनलाई निरन्तरता दिँदै श्रेष्ठलाई सल्लाहकार बनाएको हो।
इप्पानले आज आफ्नो रजत जयन्ती समारोहको अवसरमा विविध कार्यक्रमहरूको आयोजना गर्दै ऊर्जा क्षेत्रका अग्रज व्यक्तित्वहरूलाई सम्मानसमेत गरेको छ।
श्रेष्ठको नियुक्तिले इप्पानलाई ऊर्जा क्षेत्रमा थप सशक्त र प्रभावकारी बनाउन मद्दत गर्ने विश्वास व्यक्त गरिएको छ।
