काठमाडौं – आयोजक लिटिल एन्जल्स (एलए) स्कुलले पाँचौं एलए अन्तरविद्यालय नेट च्याम्पियनसिपको ब्वाइज बास्केटबलमा आइतबार जित निकाल्दै प्रतियोगिताको सुखद सुरुआत गरेको छ।
हात्तीवनस्थित घरेलु कोर्टमा भएको खेलमा एलएले एलआरआईलाई १९–१७ ले पराजित गर्यो। एलएको जितमा आयुश गोइतले सर्वाधिक १३ अंक जोड्दै टोलीलाई जित दिलाए।
ब्वाइज फुटबलतर्फ लोयल्टी एकेडेमीले एलएलाई २–० गोलले पराजित गर्यो भने ज्ञानोदयले जेम्स स्कुललाई ६–० को फराकिलो अन्तरले हरायो।
ब्वाइज भलिबलमा वैस्नवी स्कुलले उत्कृष्ट प्रदर्शन गर्दै दोहोरो जित हात पार्यो। वैस्नवीले माउन्ट ओलिभलाई २५–२२ र २५–२१ तथा अनल ज्योतिलाई २५–१५ र २५–१५ को सोझो सेटमा पराजित गर्यो।
अन्य खेलमा माउन्ट ओलिभले अनल ज्योतिलाई २५–९ र २५–१६, भ्याली पब्लिकले बालकुमारीलाई २५–१६ र २५–१४ तथा एलएले बालकुमारीलाई २३–२५, २५–११ र १५–९ ले हरायो।
प्रतियोगिताको उद्घाटन बागमती प्रदेशकी युवा तथा खेलकुद मन्त्री उर्मिला नेपालले एक कार्यक्रमबीच गरिन्।
एलएका प्रिन्सिपल मुकुन्दराज शर्माका अनुसार प्रतियोगितामा ३ सामुदायिक विद्यालयसहित २२ विद्यालय सहभागी छन्। प्रतियोगितामा बास्केटबल, भलिबल, फुटबल, टेबलटेनिस र फुटसल गरी पाँच खेल समावेश छन्।
