काठमाडौं – काष्ठमण्डप छात्र फुटसल प्रतियोगितामा आयोजक काष्ठमण्डपका ‘ए’ र ‘बी’ दुवै टोली सेमिफाइनलमा प्रवेश गरेका छन्।
समूह ‘ए’ बाट काष्ठमण्डप ‘ए’ ६ अंकसहित उपविजेता बन्दै सेमिफाइनलमा पुगेको हो भने समूह ‘बी’ बाट काष्ठमण्डप ‘बी’ ७ अंक जोड्दै समूह विजेता बनेको हो। प्रतियोगितामा ८ टिम सहभागी छन्, जसलाई दुई समूहमा विभाजन गरी लिग कम नकआउट आधारमा खेलाइएको छ।
समूह ‘ए’ बाट ७ अंकसहित द सेलिब्रेसन को–एड विजेता तथा समूह ‘बी’ बाट ६ अंकसहित एआईटीएम उपविजेता बन्दै सेमिफाइनलमा पुगेका छन्।
सेमिफाइनलमा आयोजक काष्ठमण्डप ‘ए’ र ‘बी’ आमनेसामने हुनेछन् भने अर्को सेमिफाइनलमा सेलिब्रेसन को–एड र एआईटीएमबीच प्रतिस्पर्धा हुनेछ।
प्रतियोगिताको उद्घाटन काष्ठमण्डप प्लस–२ प्रोग्राम डाइरेक्टर रिचार्ड गोमेज र ए–लेभल प्रोग्राम डाइरेक्टर यादव थपलियाले संयुक्त रूपमा गरेका थिए।
शीर्ष तीन स्थान हासिल गर्ने टोलीले क्रमशः ५० हजार, २५ हजार र १५ हजार रुपैयाँ नगद पुरस्कार प्राप्त गर्नेछन्। उत्कृष्ट खेलाडी र उत्कृष्ट गोलरक्षकलाई जनही २ हजार ५ सय रुपैयाँ नगद पुरस्कार प्रदान गरिनेछ।
भक्तवीर सिंह तुलाधर फाउन्डेसनको मुख्य प्रायोजन तथा स्टडी प्लसको सहयोगमा मण्डिखाटारस्थित काष्ठमण्डप हातामा भइरहेको प्रतियोगिता सोमबार सम्पन्न हुनेछ।
