काठमाडौं ।
राष्ट्रिय खेलकुद परिषद् (राखेप) का तेक्वान्दोका सहायक मुख्य प्रशिक्षक नोर्बु लामा प्रथम श्रेणीको अन्तर्राष्ट्रिय पुम्से रेफ्रीमा बढुवा भएका छन्। उनी उक्त उपलब्धि हासिल गर्ने पहिलो नेपाली हुन्।
विश्व तेक्वान्दो महासंघको निर्णयअनुसार लामा सन् २०२५ डिसेम्बर ३१ मा दोस्रो श्रेणीबाट प्रथम श्रेणीमा बढुवा भएका हुन्। उनले विभिन्न जी–२ स्तरका अन्तर्राष्ट्रिय प्रतियोगिता तथा रिफ्रेसर कोर्षमा सहभागिता जनाउँदै आवश्यक अंक पूरा गरेका थिए।
लामाले सन् २०२२ मा दक्षिण कोरियामा सम्पन्न विश्व पुम्से तेक्वान्दो प्रतियोगितामा निर्णायकको भूमिका समेत निर्वाह गरेका छन्। काभ्रेपलाञ्चोकका लामा ७औँ डान ब्ल्याक बेल्टधारी हुन्।
नेपाल तेक्वान्दो संघका अध्यक्ष दीपराज गुरुङले सातदोबाटोस्थित संघको कार्यालयमा उनलाई प्रमाणपत्र प्रदान गर्दै बधाइ दिएका छन्।
