काठमाडौं— युवा तथा खेलकुद मन्त्री एवं राष्ट्रिय खेलकुद परिषद् (राखेप) का अध्यक्ष बब्लु गुप्ताको अध्यक्षतामा परिषद्को १२४औँ बोर्ड बैठक सम्पन्न भएको छ।
बैठकले राष्ट्रिय खेलकुद प्रतियोगिता सञ्चालन निर्देशिका–२०८१ लाई तेस्रो संशोधनसहित पारित गरेको छ। साथै, दशौँ राष्ट्रिय खेलकुद प्रतियोगितासँगै प्रथम पारा राष्ट्रिय खेलकुद आयोजना गर्न खेल संख्या र खेलाडी कोटासम्बन्धी विषयमा कार्यकारी समितिले आवश्यक छलफल गरी सिफारिस गर्ने निर्णय गरेको छ। तयारीका लागि प्रदेश खेलकुद परिषद् तथा विभागीय टिमहरूलाई पत्राचार गर्ने निर्णय पनि बैठकले गरेको छ।
बैठकले नेपाल सरकारबाट विनियोजन भएको चालु आर्थिक वर्षको वार्षिक योजना, कार्यक्रम तथा बजेट, साथै परिषद्को आन्तरिक अनुमानित आय–व्यय विवरण पारित गरेको छ। अन्तर्राष्ट्रिय खेलकुद परिसर, सातदोबाटोमा ‘जेनजी शहीद स्मृति पार्क’ निर्माण गर्ने तथा त्यहाँ रहेको अडिटोरियम हललाई ‘जेनजी स्मृति अडिटोरियम हल’ नामकरण गर्ने निर्णय समेत गरिएको छ।
त्यसैगरी, सन् २०२६ मा जापानमा आयोजना हुने २०औँ एशियाली खेलकुद प्रतियोगितामा नेपालले सहभागिता जनाउने निर्णय पनि बैठकले गरेको छ।
बैठकमा परिषद्का उपाध्यक्ष ध्रुव आचार्य, युवा तथा खेलकुद मन्त्रालयका सचिव डा. हरिप्रसाद लम्साल, सदस्य–सचिव रामचरित्र मेहता, राखेप बोर्ड सदस्यलगायतको उपस्थिति रहेको थियो।
