काठमाडौं।
राष्ट्रिय खेलकुद परिषद् (राखेप) ले पाँचौं एसियाली युथ पारा खेलकुद अन्तर्गत तेक्वान्दो प्रतियोगितामा कांस्य पदक जितेकी खेलाडी रेनु तामाङ तथा उनका प्रशिक्षक कविराज नेगी लामालाई बधाई दिएको छ।
राखेपका सदस्य–सचिव रामचरित्र मेहताले मंगलबार त्रिपुरेश्वरस्थित आफ्नै कार्यकक्षमा रेनु तामाङ र प्रशिक्षक नेगी लामालाई भेट गरी बधाई तथा सम्मान गर्दै आगामी दिनमा अझ ठूलो सफलता प्राप्त गर्न शुभकामना व्यक्त गरे।
रेनु तामाङले दुबईमा डिसेम्बर ७ देखि १४ तारिखसम्म आयोजना भएको पाँचौं एसियाली युथ पारा खेलकुदमा के–४४ क्याटगोरी अन्तर्गत महिला ४७ केजीमुनि तौलसमूहमा कांस्य पदक जितेकी हुन्। उनको यो उपलब्धिलाई नेपाली खेलकुद क्षेत्रका लागि महत्वपूर्ण मानिएको छ।
रेनु हाल राखेपले सञ्चालन गरिरहेको ‘मिसन–२०२६’ कार्यक्रम अन्तर्गत राष्ट्रिय टिम तयारीको विशेष प्रशिक्षणमा सहभागी खेलाडी हुन्। उनको सफलताले भविष्यमा अन्तर्राष्ट्रिय प्रतियोगितामा अझ उत्कृष्ट प्रदर्शन गर्ने अपेक्षा गरिएको छ।
उक्त अवसरमा राखेप कार्यकारी समितिका सदस्य भानबहादुर चन्द, राखेपकी सदस्य नन्दा बस्याललगायत पदाधिकारीहरूको उपस्थिति रहेको थियो।
