काठमाडौं। ललितपुर महानगरपालिका–८ की सुरम्य शाक्यले पाँचौँ अल नेपाल अन्तरवडा राष्ट्रिय टेबलटेनिस प्रतियोगिताको यु–१६ गल्र्स सिंगल्सतर्फ स्वर्ण पदक जितेकी छन्। मंगलबार भएको फाइनलमा जित निकाल्दै सुरम्य प्रतियोगितामा स्वर्ण जित्ने पहिलो खेलाडी बन्न सफल भइन्।
लैनचौरस्थित राष्ट्रिय टेबलटेनिस प्रशिक्षण केन्द्रमा सम्पन्न फाइनल खेलमा सुरम्यले भक्तपुर–५ की नर्मदा खाइतुलाई ११–४, ११–५, ८–११ र ११–५ को सेटमा पराजित गरिन्। प्रतियोगितामा भक्तपुर–२ की उरवी सुवाल र ललितपुर–१७ की अर्सना महर्जन संयुक्त रूपमा तेस्रो स्थानमा रहे।
स्पिन इभेन्ट्सको व्यवस्थापन तथा स्पिन टेबलटेनिस क्लबको आयोजनामा सञ्चालन भइरहेको प्रतियोगितामा पुरुष तथा महिला सिंगल्ससहित विभिन्न ११ स्पर्धामा प्रतिस्पर्धा भइरहेको छ। अनरको मुख्य प्रायोजन तथा एनआईइसी एजुकेसन कन्सल्टेन्सी र एभरेष्ट फेसनको सह–प्रायोजनमा भइरहेको प्रतियोगिता शनिबारसम्म जारी रहनेछ।
