काठमाडौं। चीनको अग्रणी टेबलटेनिस ब्रान्डमध्ये एक यिन्हे स्पोर्ट्स इक्विपमेन्ट कम्पनी लिमिटेडले नेपालका राष्ट्रिय टेबलटेनिस खेलाडी संयोग कपालीलाई प्रायोजन गर्ने भएको छ।
नेपालमा यिन्हेको आधिकारिक विक्रेता डाँफे स्पोर्ट्सका प्रमुख कार्यकारी अधिकृत नितिश राजभण्डारी र खेलाडी कपालीबीच दुई वर्षका लागि सम्झौता सम्पन्न भएको हो। अखिल नेपाल टेबलटेनिस संघका कोषाध्यक्ष ज्याकी महर्जनका अनुसार सम्झौता पत्रमा दुवै पक्षले हस्ताक्षर गरेका छन्।
सम्झौताअनुसार यिन्हेले संयोग कपालीको तालिम तथा व्यावसायिक विकासलाई सहयोग गर्ने उद्देश्यले आवश्यक खेल सामग्री र पोशाक उपलब्ध गराउनेछ।
